Aldrei fleiri útlendingar

Hlutfall erlendra starfsmanna á vinnumarkaði á Íslandi er með því hæsta á Norðurlöndunum. Aðeins í Svíþjóð er hlutfallið hærra og er munurinn óverulegur. Á Íslandi er erlent vinnuafl 4,5 prósent vinnumarkaðarins en í Svíþjóð mælist það 4,6 prósent. Í Danmörku, þar sem umræðan um útlendinga hefur verið hvað mest áberandi, er hlutfall erlendra ríkisborgara á vinnumarkaðinum þrjú prósent. Hlutfallið er lægst í Finnlandi þar sem 1,4 prósent vinnuafls eru erlendir ríkisborgarar. Tvöfalt fleiri erlendir ríkisborgarar eru búsettir á Íslandi nú en fyrir áratug og hefur þeim fjölgað úr 4.800 í um ellefu þúsund. Af þeim eru um sjö þúsund á vinnumarkaðinum. Að sögn Gissurar Péturssonar, forstjóra Vinnumálastofnunar, má telja víst að alls vanti starfsfólk í um þrjú þúsund störf á Íslandi. Sökum takmarkana í veitingu atvinnuleyfa verður ekki fyllt í þau störf með útlenskum starfsmönnum. Þrátt fyrir skort á vinnuafli verður atvinnuleyfum ekki fjölgað umfram það sem þegar hefur verið veitt. "Við verðum líka að vera undir það búin að geta tekið bakslagið. Það vantar stórlega fólk til skamms tíma en hið opinbera getur ekki látið stýrast af því heldur þarf að hugsa fram í tímann," segir Gissur. Tryggvi Þór Herbertsson, forstöðumaður Hagfræðistofnunar Háskóla Íslands, telur að manna eigi þau störf sem ekki tekst að ráða íslenskt starfsfólk í, með innflutningi vinnuafls. "Það er að mörgu leyti lausn fyrir Ísland þegar koma tímabil með miklum hagvexti og mikilli þenslu líkt og núna," segir hann.