Máttleysi stjórnvalda gagnrýnt

Viðbrögðin við Katrínu og afleiðingum hennar hafa verið harðlega gagnrýnd. Íbúar skilja ekki hvers vegna ekkert var gert til að koma í veg fyrir hörmungarnar og hvers vegna enginn kom þeim til hjálpar þegar í stað. Íslenskir verkfræðingar segja að það hafi verið fyrirsjáanlegt hvernig færi áður en Katrín skall á. Þegar Bandaríkjaþing kemur saman á ný í næstu viku ætla tvær þingnefndir að taka viðbrögð stjórnvalda við hamförunum í Suðurríkjunum til skoðunar. Hillary Clinton hefur krafist þess að sérstök rannsóknarnefnd verði skipuð til að kanna hvernig jafnlangur tími gat liðið og raun ber vitni uns hjólin tóku að snúast. Bill Clinton, sem ýtti í gærkvöldi úr vör sérstöku söfnunarátaki með Bush eldri, er einnig gagnrýninn. Bill Clinton, fyrrverandi Bandaríkjaforseti, segir að ýtarlega greining þurfi að eiga sér stað á atburðunum. Hann sagði einnig að nauðsynlegt væri að skipuleggja hjálparsamtök sem komið hafa að málinu. Hann sagði að enn væri verið að finna bæði lifendur og látna og hamfarasvæðinu og hann benti einnig á að fjölmargir þeirra sem væri saknað væru ef til vill enn á lífi. Hann lagði áherslu á að á þessum tíma væri nauðsynlegt að setja sig í spor þeirra sem upplifað hafa hörmungarnar og eru enn að því. Talsmenn Hvíta hússins segja að þar á bæ standi ekki til í að taka þátt í því að kenna einhverjum um, en New York Times segir að í raun sé í undirbúningi herferð til að kenna um yfirvöldum í ríkjunum sem verst urðu úti. Ritstjórar dagblaðsins Times-Picayune í New Orleans eru hins vegar með á hreinu hver ber ábyrgðina þegar öllu er á botninn hvolft: Bush forseti, og það skrifuðu þeir í leiðara blaðsins. Íslenski verkfræðingurinn Sigurður Magnús Garðarsson, dósent við háskóla Íslands, segir að það sem gerðist í New Orleans hafi verið nákvæmlega eins og búast hefði mátt við. Hann segir það vera alveg ljóst að varnagarðarnir í borginni væru hannaðir fyrir miklu minni fellibylji en nú reið yfir þannig að í rauninni gerðu hönnunarforsendur ráð fyrir því að varnargarðarnir rofnuðu eða hyrfu. Varnargarðarnir bresta og þá virðist sem almannavarnarkerfið bregðist ekki nógu hratt við en nánari rannsókn á eftir að fara fram. En Sigurður sagði að frá sjónarhóli sérfræðinga hefði þetta ekki átt að koma á óvart þar sem búið var að spá þessu. Aðspurður hvort það hefði verið mögulegt að koma í veg fyrir þetta sagði Sigurður að mögulegt hefði verið að koma í veg fyrir þetta og benti á leiðir eins og hærri varnargarða.