82 ára sótti um vinnu á Hrafnistu

Fólk á áttræðisaldri er meðal umsækjenda um umönnunarstörf á dvalarheimilum Hrafnistu í Reykjavík og Hafnarfirði sem voru auglýst fyrir skömmu að sögn Steinunnar Þorsteinsdóttur hjá starfsmannaþjónustu Hrafnistu. Elsti umsækjandinn er 82 ára. hann sótti um starf í mötuneyti Hrafnistu. Sveinn Skúlason, forstjóri Hrafnistu, segir að skortur á starfsfólki sé yfirleitt hefðbundið haustvandamál, en í mun meiri mæli nú en áður. "Það er meiri hreyfing á fólki og spennan minnir dálítið á árin 2000-2001," segir hann. "Ráðningarnar hafa gengið hægt og rólega. Fyrir rúmlega hálfum mánuði vantaði 34 stöðugildi, en um það bil 25 núna. Á Hrafnistu í Reykjavík eru um 300 stöðugildi, þannig að það eru 10 prósent sem vantar. Hjá okkur hefur fólk unnið alveg til sjötugs og jafnvel lengur í gegnum árin, ef það vill vinna og heldur heilsu. Auglýsing Húsasmiðjunnar eftir eldra fólki til starfa ýtti við okkur að láta vita betur af okkur að við værum einnig tilbúin til að taka fólk á þessum aldri í vinnu, þótt svo að við hefðum gert það í gegnum árin. Við erum aðallega að hugsa um fólk á aldrinum 65 ára til sjötugs. Það er fullt af fólki úti í þjóðfélaginu sem er við fulla heilsu og vill gjarnan vinna eitthvað og hitta annað fólk." Sveinn segir enn fremur að eldra starfsfólki á Hrafnistu sé boðið upp á sveigjanlegan vinnutíma á tímakaupi. Það geti til að mynda unnið tvo laugardaga í mánuði, tvisvar í viku og unnið frá klukkan 17-20. Þessu hafi forráðamenn Hrafnistu viljað koma á framfæri. "Skortur á starfsfólki er bundinn við umönnunarstörfin," heldur Sveinn áfram. "Við erum betur stödd en oft áður hvað varðar fagfólkið, og þá fyrst og fremst hjúkrunarfræðingana." Ingólfur Þórisson, framkvæmdastjóri tækni- og eignasviðs á Landspítala - háskólasjúkrahúsi, sagði stöðuna í starfsmannahaldi ófaglærðra svipaða og undanfarin ár. Alltaf væri einhver hreyfing, þó ekki meiri nú en áður.