Hjón reisa 400 íbúða hverfi

Mosfellsbær hefur gert samkomulag við eigendur landsins Leirvogstungu í Mosfellsbæ um uppbyggingu 400 íbúða næstu fjögur árin. Samningurinn er nýmæli því um einkaframkvæmd að öllu leyti er að ræða og uppbyggingin sveitarfélaginu alveg að kostnaðarlausu. Skipulag gerir ráð fyrir að byggð verði sérbýli að mestu enda mikil eftirspurn eftir slíkum eignum nálægt höfuðborgarsvæðinu. Heildarkostnaður vegna verkefnisins er talinn nema tveimur milljörðum króna en í þeim tölum er allur kostnaður vegna skipulagsvinnu og byggingakostnaðar auk vegavinnu. Framkvæmdaaðilinn tekur einnig að sér að fjármagna og byggja skóla og leikskóla á svæðinu en slíkt hefur ekki verið gert áður hér á landi. Mun sá skóli að líkindum verða sambyggður ef núverandi hugmyndir ganga eftir. Bjarni Sv. Guðmundsson, sem á og rekur fyrirtækið Leirvogstungu ehf. ásamt konu sinni Katrínu Sif Ragnarsdóttur, segir engar hugmyndir uppi varðandi hugsanlegt lóðaverð. "Við erum ekki komin svo langt að hugsa það til þrautar en leyfum markaðnum að ráða því þegar þar að kemur. Annars standa vonir til að íbúðakaup verði á færi venjulegs fólks og ekki endilega í þeim hæðum sem fregnir hafa borist af undanfarið." Hann segir að hugmyndin að íbúðabyggð hafi kviknað fyrir alllöngu síðan en ekki sé sérstaklega hlaupið til vegna þess að fýsilegt er að selja þessa dagana. "Það hefur tekið ákveðinn tíma að gera þetta að veruleika og ákvörðunin hefur ekkert með núverandi ástand á markaðnum að gera." Leirvogstunga markast af Leirvogsá að norðan og Köldukvísl að sunnan og verður svæðið sérstaklega skipulagt með þarfir fjölskyldufólks í huga. Stutt vegalengd er að og íþrótta- og útivistarsvæðum að Varmá auk annarra útivistarsvæði í nágrenninu. Mun byggðin samræmast stefnu Mosfellsbæjar og koma til móts við kröfur markaðarins um aukið framboð sérbýla í nágrenninu.