Björn bestur í hrútaþukli

"Þetta var óvænt," segir Björn Þormóður Björnsson á Ytra-Hóli um sigurinn á sunnudag. Dómnefndin, sem skipuð var þremur þrautreyndum sauðfjárræktarráðunautum, var sammála um að Björn hefði staðið sig best í að dæma hrúta út frá þeim stöðlum sem um slík fræði gilda, þótt mjótt hefði verið á munum. Björn segist ekki hafa hugsað mikið um úrslitin á meðan á móti stóð en auðvitað hafi verið gaman að vinna. Jón Jónsson, Strandamaður og sagnfræðingur, var ánægður með mótshaldið. "Þetta gekk ljómandi vel og keppnin var feikihörð," segir hann. Hátt í 300 manns fylgdust með mótinu en 27 kepptu í flokki hinna vönu. Keppendur komu víða að, allt frá Skagafirði í norðri að Skálholti í suðri, en flestir voru úr nærsveitum Strandanna. Björn sigurvegari er kjötmatsmaður hjá Sölufélagi Austur-Húnvetninga og segir Matthías Lýðsson bóndi á Húsavík, sem kom að mótshaldinu, að ekki spilli fyrir að búa yfir mikilli reynslu á því sviði. Björn heldur nokkrar kindur en vill ekki láta uppi um fjölda þeirra. "Þetta er innan skynsemismarka," segir hann og viðurkennir um leið að aðalverðlaunin, 15 skammtar af hrútasæði frá Sauðfjársæðingastöð Vesturlands, komi að góðum notum. Rebekka Eiríksdóttir frá Stað vann í flokki óvanra en hún bar sigurorð af móðursystur sinni Dagrúnu Magnúsdóttur sem hafnaði í öðru sæti. Rebekka var að vonum sæl með sigurinn en segir það ekki hafa verið sér sérstakt kappsmál að vinna frænku sína. Hún og maður hennar halda sex hundruð fjár á Stað og eru því ýmsum hnútum kunnug þegar kemur að sauðfé þótt ekki teljist Rebekka vön í hrútaþukli. Strandamenn voru staðráðnir í að standa sig betur í ár en í fyrra þegar vel flest verðlaun fóru í Húnavatnssýslurnar. Það gekk eftir og skiptu þrír heimamenn með sér þriðju verðlaununum í flokki vanra, auk þess sem önnur og þriðju verðlaun í flokki óvanra féllu í skaut Strandamanna. Glæsileg verðlaun voru í boði; sokkar, vettlingar, teppi, prjónabækur, handverk, rækjur og gisting auk áðurnefnds sæðis sem kostar sitt eins og bændur vita.