Leiðarkort Strætó er hálfkák

"Ég leitaði samstarfs við Strætó fyrir tæpum fjórum árum þegar ljóst var að hanna ætti nýtt leiðarkerfi," segir Ingi Gunnar Jóhannsson landfræðingur og kortagerðamaður. Hann hefur, í samvinnu við Auglýsingastofu Þórhildar, hannað svonefnt huglægt kort af nýja leiðarkerfinu en slík kort eru mörgum kunn úr leiðarkerfum jarðlesta evrópskra stórborga. Þrátt fyrir ágætar viðtökur hjá Strætó hefur ekki fengist grænt ljós á samstarf um útgáfuna. Ingi Gunnar taldi sig vera á beinni og breiðri braut þegar hugmyndir hans voru notaðar til frumkynningar nýja leiðarkerfisins fyrir almenningi í september á síðasta ári. Nú virðast ljón í veginum og hefur Strætó gefið út annað leiðarkort. Það kallar Ingi Gunnar hálfkák sem nýtast mun strætófarþegum illa. Munurinn á huglægum kortum og hefðbundnum er sá að ekki er sýnt það eiginlega svæði sem kortið nær yfir, beygjur og réttar fjarlægðir víkja fyrir einfaldleika beinna lína. Lykilatriðið er að nafgreina stoppistöðvar og sýna glögglega hvar leiðir mætast. "Með svona kort í höndunum getur notandinn hoppað upp í vagn og hringsólað um borgina og það án þess að týnast heldur þvert á móti vita alltaf hvar hann er." Ingi Gunnar nefnir það einnig sem mikilvægan kost huglægra korta að fólk þarf ekki að kunna sérstök skil á borginni sem ferðast er um. "Með kortið í höndunum og vel merktar stoppistöðvar gengur þetta upp, alveg eins og í París, Róm eða Hamborg eða bara hvar sem er. Svona ferðast menn á 21. öldinni og gerðu reyndar líka á þeirri 20." Ingi Gunnar hefur hannað og gefið út huglægt kort fyrir leiðarkerfi langferðabíla landsins og er því dreift árlega í 60 þúsund eintökum til ferðamanna. Útgáfan er kostuð með auglýsingum á kortinu. Hann hefur átt í viðræðum við forsvarsmenn Strætó um samstarf um útgáfuna en enn er óljóst hvort fyrirtækið komi að verkinu. Það hefur jú gefið út eigið leiðarkort, sem Ingi Gunnar ber ekki vel söguna. En býst hann við að kortið komi fyrir almennings sjónir hvort sem Strætó verður með eða ekki? "Ég gef þetta út sjálfur ef Strætó leitar ekki samstarfs. Borgarbúar fá að sjá þetta innan tíðar enda eiga þeir skilið að rata um og njóta þessa frábæra leiðakerfis sem nú er búið að byggja upp. Þannig mun kerfið líka nýtast miklu betur."