Fjórðungur fræðimanna óvirkur

Fjórðungur fræðimanna í fullu starfi við Háskóla Íslands eru nánast óvirkir í rannsóknum. Þetta kemur fram í úttekt um gæði rannsókna við skólann. Launakerfi fræðimanna er afkastahvetjandi og þeir hafa skyldu til að verja 43 prósentum af tíma sínum til rannsókna en engar lágmarkskröfur eru gerðar um árangur. Elstu og yngstu fræðimennirnir eru síst virkir, en þeir síðarnefndu hófu margir hverjir störf meðan minni áhersla var lögð á rannsóknir. "Skólinn er með afar gott kerfi til að meta árangur í fræðastörfum," segir Inga Dóra Sigfúsdóttir, sem er doktor í félagsfræði við Háskólann í Reykjavík og aðalhöfundur úttektarinnar. "Það á vera auðvelt að setja kröfur um lágmarksafköst." Inga Dóra getur ekki séð að það séu kennsla eða stjórnunarstörf fræðimanna sem taki tíma frá rannsóknum. "Þvert á móti. Þeir sem eru virkir í stjórnun og kennslu virðast oft vera með þeim virkustu í rannsóknum." Í skýrslunni er bent á fjöldamörg fleiri atriði og ýmsar ábendingar og hugmyndir settar fram. "Það þarf að taka allt fjárveitingakerfi til rannsókna í háskólastarfi til endurskoðunar," segir Inga Dóra. Fastar fjárveitingar sem háskólinn fær til rannsókna taka ekki mið af árangri. "Það vantar hvata fyrir stofnanir til að ná árangri í rannsóknum." Hún telur of mikið af rannsóknarfé eyrnamerkt stofnunum eða verkefnum og segir að frekar ætti að notast við samkeppnissjóði. Í úttektinni er lagt til að komið verði á einum rannsóknarsjóði fyrir alla háskóla, stofnanir, fyrirtæki og einstaklinga þar sem úthlutað yrði eftir gæðum rannsókna og frammistöðu umsækjenda. "Samkeppni er holl og heilbrigð og kemur vísindastofnunum og samfélaginu til góða. Við eigum að tryggja það að Háskólinn geti tekið þátt í henni." Háskólar ættu almennt að fá góða grunnfjármögnun frá ríkinu, en rannsóknarfjármagn umfram hana ætti fyrst og fremst að koma úr slíkum samkeppnissjóðum. Ekki náðist í Kristínu Ingólfsdóttir rektor.