Ósamstaða hafi skaðað R-listann

Ósamstaða flokkanna sem standa að R-listanum hefur skaðað listann að mati Stefáns Jóns Hafsteins, borgarfulltrúa. Hann vill að fundur viðræðunefndar um áframhaldandi samstarf R listans á morgun verði sá síðasti. Fundur viðræðunefnda flokka R-listans stóð fram á nótt. Í dag ræddu flokksmenn sín á milli og undurbjuggu fund sem haldinn verður klukkan fimm á morgun. Ýmsar tillögur hafa verið nefndar og samkvæmt heimildum fréttastofu Stöðvar 2 stendur hnífurinn oftast í kúnni hjá Vinstri - grænum. Þeir vilja ekki sameiginlegt prófkjör en út á það ganga sumar hugmyndirnar sem fram hafa komið. Stefáni Jóni Hafstein, borgarfulltrúa R-listans, finnst nóg komið af starfi viðræðunefndarinnar og vill að hún skili af sér sinni vinnu. Hann segist telja að ferli viðræðunefndanna sé komið á enda. Þær muni gera úrslitatilraun á morgun og hann vonist til þess að þær skili af sér einhvers konar grunnhugmynd sem hægt verði að ræða í flokksfélögunum til ákvörðunar. Það sé kominn tími til að félagarnir fái að ræða málið. Aðspurður hvort hann búist þá ekki við endalegri niðurstöðu á morgun um áframhaldandi samstarf flokkanna segir Stefán að endanlega ákvörðun sé alltaf hjá félögunum. Viðræðunefnd sé bara viðræðunefnd og þeirra hlutverk sé að skila ákveðinni grunnhugmynd inn til flokksfélaganna og svo taki þau ákvörðun. Spurður hvort hann vilji að fundur viðræðunefndarinnar á morgun verði sá síðasti, segir Stefán að honum fyndist það gott og að menn geti gengið frá honum með sameiginlega tillögu sem þeir beri undir félögin. Margar tillögur hafa komið fram á fundum viðræðunefndarinnar þótt flokkarnir hafi ekki komist að sameiginlegri niðurstöðum um hvað leið skal fara. Ein tillagan var að af átta efstu sætum á listanum fengi Samfylkingin þrjá, Framsóknarflokkur tvo og Vinstri - grænir tvo, en áttundi maðurinn yrði fundinn með sameiginlegu prófkjöri um borgarstjóraefni. Vinstri - grænir vilja ekki prófkjör og heldur ekki hugmynd um að allir flokkar fengju tvo menn en síðan yrði prófkjör um tvo. Auk þess segja heimildir að þeir vilji ekki sætta sig við minna en þrjá borgarfulltrúa til að fá meira út úr samstarfinu en þeir telja sig fá án þess. Þá hafnaði Samfylkingin hugmynd þess efnis að hún fengi þrjá menn, Framsókn þrjá og Vinstri grænir tvo og að annar þeirra yrði borgarstjóri. En telur Stefán að þessir erfiðleikar með að ná lendingu hafi skaðað R-listann? Stefán segist telja að fólki finnist þetta vandræðalegt og það hafi skaðað flokkinn, en þó ekki til ólífis.