Báðir hreyflar vélar stöðvuðust

Flugslysið undan ströndum Sikileyjar í gær varð vegna þess að báðir hreyflar vélarinnar stöðvuðust, skyndilega. 39 manns voru um borð í vélinni sem var skrúfuþota af gerðinni ATR 72. Hún var á leið frá borginni Bari á Suðaustur-Ítalíu til ferðamannaeyjarinnar Djerba sem er undan ströndum Túnis. Flugstjóri vélarinnar segir að eftir að vélin verið á flugi í eina klukkustund hafi annar mótor hennar skyndilega stöðvast. Hann sendi þá út neyðarkall og bað um leyfi til þess að nauðlenda í Palermo á Sikiley. En áður en vélin náði þangað stöðvaðist hinn mótorinn og þá var ekki um annað að ræða en að nauðlenda á sjónum. Vélin brotnaði í lendingunni og einn farþeganna lýsti því þannig að hún hefði opnast eins og mjólkurferna. Farþegarnir svömluðu út úr vélinni og héldu sér á floti á braki úr henni. Fljótlega dreif að björgunarbáta og þyrlur. Þrettán manns fundust látnir, 24 var bjargað og tveggja er enn saknað. Margir þeirra sem bjargað var eru slasaðir eftir nauðlendinguna.