Dýralæknar ósáttir við Selfoss

Allir starfsmenn embættis yfirdýralæknis eru andvígir því að ný Landbúnaðarstofnun verði staðsett á Selfossi. Landbúnaðarstofnun er ný stofnun sem heyrir undir Landbúnaðarráðuneytið og mun taka til starfa í ársbyrjun 2006. Yfirdýralæknir og nokkrar smærri stofnanir munu heyra undir nýju stofnunina, en starfsmenn yfirdýralæknis verða meirihluti starfsmanna hennar. 36 af 41 starfsmanni yfirdýralæknis skrifuðu bréf til ráðherra í síðasta mánuði og mótmæltu staðsetningunni. Eftir því sem Fréttablaðið kemst næst áttu fulltrúar starfsmanna í kjölfarið fund með Guðna Ágústssyni landbúnaðarráðherra þar sem hann lýsti megnri óánægju með tilurð og innihald bréfsins. Í bréfinu segja starfsmennirnir staðsetningu Landbúnaðarstofnunar kollvarpa fyrirætlunum embættisins, en í mörg hafi verið stefnt að því að sameina þá starfsmenn sem gegna þjónustu og stjórnsýslu á höfuðborgarsvæðinu. Ekki náðist í Guðna í gær.