Tilboð upp á rúmar 700 milljónir

Viðræður eru hafnar milli Reykjavíkurborgar og Íslenska gámafélagsins um kaup þess síðarnefnda á Vélamiðstöð Reykjavíkur en gámafélagið var hæstbjóðandi í nýafstöðu útboði. Hljóðaði boð þeirra upp á 735 milljónir króna en salan er hluti af endurskoðun á rekstri og rekstrarformi borgarfyrirtækja, en Vélamiðstöðin er sameign borgarinnar og Orkuveitu Reykjavíkur. Átta tilboð bárust áður en frestur rann út á föstudaginn var en aðrir helstu bjóðendur voru GT verktakar, Kirkjuhvoll ehf., Stilling hf., Hilmar Ólafsson ehf. og Bugar ehf. auk eins sameiginlegs tilboðs.