Rjúpnaveiði hefst á ný

Rjúpnaveiðar hefjast aftur í haust en Sigríður Anna Þórðardóttir umhverfisráðherra tilkynnti ákvörðun sína þess lútandi í gær. Enn liggur ekki fyrir hversu margar verður heimilt að veiða en reglugerð um veiðarnar lítur dagsins ljós í lok næsta mánaðar eða byrjun september. Sigmar B. Hauksson formaður Skotveiðifélags Íslands er hress með tíðindin en segir þó að skotveiðimenn hafi átt von á þessu þar sem niðurstöður rjúpnatalningar Náttúrufræðistofnunar Íslands bendi til þess að rjúpnastofninn hafi meira en þrefaldast á síðustu tveimur árum. Hann er einnig ánægður með þær breytingar sem liggja fyrir varðandi stjórn á veiðum. "Það liggur fyrir að sala á rjúpu verði óheimil og því fögnum við skotveiðimenn en við teljum nauðsynlegt að reyna að stemma stigum við magnveiðum, því sem stundum er kallað græðgisveiðar því við leggjum áherslu á að skotveiði er frístundariðja öðru fremur," segir Sigmar. Hann segist eiga von á því að flestir séu sáttir við þessa ákvörðun ráðherrans.