Útreikningar FÍB rangir

Fjármálaráðuneytið segir það rangt sem fram kemur í máli Stefáns Ásgrímssonar, ritstjóra blaðs Félags íslenskra bifreiðaeigenda, í Fréttablaðinu í gær að íslenska ríkið taki til sín um áttatíu krónur af hverjum seldum lítra af bensíni. Kom fram í máli Stefáns að ríkið væri að margskattleggja hvern lítra og skoraði hann á stjórnvöld að lækka álögur sínar hið fyrsta. Fjármálaráðuneytið segir tölur Stefáns miðast við álagningu eins og hún var þegar sérstakt vörugjald var lagt á bensín en það hafi verið aflagt 1999. Þær eigi því ekki við í dag enda sé álagning ríkisins milli 55 og 56 prósent á bensín og dísilolíu og álagningin því um 64 krónur á hvern lítra en ekki 80 krónur eins og útreikningar Stefáns gefi til kynna. Kemur ennfremur fram í svari ráðuneytisins að álagning ríkisins útskýri því ekki hátt bensínverð en bent á að álagning olíufélaganna sé óvíða meiri en hér á Íslandi.