Ístak lægstbjóðandi í Færeyjum

"Þarna er um tveggja ára verkefni að ræða ef við hljótum hnossið en það ætti að koma í ljós næstu daga," segir Loftur Árnason, framkvæmdastjóri Ístak. Fyrirtækið bauð lægst allra í útboði um gangagerð milli Öravik og Hov í Færeyjum og telur Loftur góðar líkur á að verkið falli þeim í skaut en tilboðið þeirra hljóðaði upp á tæplega 1.4 milljarð króna. Um talsverða framkvæmd er að ræða en Loftur segir að gert sé ráð fyrir að verkið taki allt að tveimur árum ef allt gengur að óskum. "Þarna er um gangagerð að ræða og vegagerð að auki og við áætlum að nota íslenska starfsmenn að hluta til verksins. Að öðru leyti reynum við að fá heimamenn okkur til aðstoðar." Ístak hefur áður bæði eitt og sér og í samstarfi við danska verktakafyrirtækið Pihl & Son unnið að verkefnum í Færeyjum og því séu þeir vel að sér hvað það varðar. Fyrirtækið er ennfremur að vinna að stíflugerð á Grænlandi auk verkefna hér á landi og því í nógu að snúast. Hjá fyrirtækinu starfa nú um 650 manns og þar af um 150 erlendir starfsmenn.