Brisfrumur græddar í konu

Lækning gæti verið í sjónmáli við insúlínháðri sykursýki eftir að læknum í Japan tókst að græða brisfrumur úr konu í dóttur hennar sem þjáðist af sjúkdómnum. Þetta er í fyrsta sinn sem flutningur brisfruma úr lifandi manneskju í aðra heppnast vel en aðgerðin fór fram á háskólasjúkrahúsinu í Kyoto í Japan á dögunum. Að sögn BBC heilsast mæðgunum vel og hefur dóttirin ekki þurft að sprauta sig með insúlíni síðan fljótlega eftir að frumurnar voru græddar í hana. Brisfrumur, sem eru teknar úr briskirtlinum, framleiða insúlín en það stýrir blóðsykurmagni líkamans. Brisfrumur sykursjúkra eiga hins vegar í vandræðum með að búa til hormónið. Áður hafa menn freistað þess að græða brisfrumur úr látnu fólki í sykursjúka, með misgóðum árangri því frumurnar eru oft skemmdar. Þótt fyrstu aðgerðirnar lofi góðu þá vara læknar við of mikilli bjartsýni því aðferðin er enn á tilraunastigi. Auk þess þýðir aðgerðin að frumugjafanum er sjálfum hættara við að fá sykursýki. Um sex þúsund Íslendingar eru með sykursýki en aðeins hluti þeirra er með þá insúlínháðu.