Veirunni eytt

Rannsóknarstofur um allan heim eru nú að eyða banvænni flensuveiru sem var send til þeirra fyrir misskilning. Veiran olli heimsfaraldri árið 1957 og kostaði þá fjórar milljónir manna lífið. Veiran var send frá Bandaríkjunum til 5000 rannsóknarstofa í átján löndum. Hún er af svokallaðri Asíuinfluensu sem smitast auðveldlega milli manna. Og þar sem svo langt er um liðið frá því hún gekk hefur fólk sem er fætt eftir þennan tíma ekkert mótefni gegn henni. Mestar áhyggjur hafa menn þó af því að eitthvað af öllum þessum 5000 veirusendingum geti lent í höndum hryðjuverkamanna sem noti hana til þess að búa til sýklavopn. Alþjóðaheilbrigðisstofnunin krafðist því þess  að veirunni yrði eytt og hafa rannsóknarstofur verið að senda inn tilkynningar um að búið sé að gera það. Það þarf hins vegar að sannreyna og auk þess eru ekki komin svör frá nærri öllum. Þá er ekki heldur vitað hvort einhver hafi hugsanlega smitast. Því bíður Alþjóðaheilbrigðisstofnunin nú milli vonar og ótta eftir að sjá hvort allt skili sér.