Réttað í van Gogh-máli

Mohammed Bouyeri, marokkósk-ættaði Hollendingurinn sem ákærður er fyrir morðið á hollenska kvikmyndagerðarmanninum Theo van Gogh, kom fyrir rétt í fyrsta sinn í Amsterdam í gær. Hann reyndi ekki að bera af sér sakir né skýra mál sitt. Morðið vakti gríðarlega reiði í Hollandi, en það var framið um hábjartan dag á götu í Amsterdam í byrjun nóvember síðastliðins. Van Gogh var skotinn mörgum skotum og á líkið var fest með hnífi margra síðna yfirlýsing frá morðingjanum, full af íslömsku trúarofstækistali og hótunum í garð fleiri hollenskra stjórnmálamanna. Þegar morðið var framið var nýbúið að sýna í sjónvarpi heimildarmynd van Goghs sem fjallaði um kúgun múslimakvenna.