NBA - Meistararnir í vanda

Meistarar Detroit Pistons, sem eru nýkomnir af átta leikja sigurgöngu, eru á ferðalagi á vesturströndinni þessa dagana. Þar hafa þeir fengið óblíðar móttökur og eftir að hafa tapað fyrir Phoenix Suns í fyrrinótt, lentu þeir í klónum á öðru toppliði vestanmegin Seattle Supersonics og þurftu að þola annað tap 95-87.  Sonics hafa komið liða mest á óvart í vetur og treysta á hraðan leik og skot utan af velli, nokkuð sem ekki hefur þótt heillavænlegt í deildinni fram að þessu.  Þrátt fyrir að aðalskorarar Sonics ættu ekki sérstakan dag, náðu þeir að leggja meistarana og eru í þægilegri stöðu í norðvesturriðlinum. Liðið er í harðri baráttu um efstu sætin í vesturdeildinni og heimavallarréttinn í úrslitakeppninni í vor. Atkvæðamestir í liði Sonics í nótt voru þeir Rashard Lewis með 18 stig og Jerome James með 16 stig. Hjá meisturum Detroit var Richard Hamilton stigahæstur með 16 stig og Chauncy Billups setti 13 stig.