Ekki eðlileg vinnubrögð

"Við náum samkomulagi við Víking um að fá að ræða við leikmanninn og að því loknu finnst mér eðlilegt að við fáum okkar tíma til að ræða við hann. Ég vissi af áhuga Keflavíkur og með þær upplýsingar til hliðsjónar fóru af stað samningaviðræður við leikmanninn. Síðan veit ég ekki fyrr en hann er allt í einu búinn að ná munnlegu samkomulagi við Val. Ég bara skil þetta ekki," segir Sigurður Helgason, framkvæmdastjóri KR-Sports, en hann er allt annað en sáttur við framkomu varnarmannsins Grétars Sigfinns Sigurðssonar í garð síns gamla félags, KR. Grétar skrifaði í gær undir lánssamning við Val sem gildir út tímabilið og segir Sigurður að með því hafi Grétar farið á bak við sitt gamla félag. "Mér finnst hann hafa komið mjög illa fram við okkur," segir Sigurður. Hann líkir vinnubrögðunum í þessu máli við uppboð þar sem hæstbjóðandi hreppi gullið. "Það er ekki eðlilegt að leikmaður sé að ræða við þrjú lið á sama tíma eins og raunin er augljóslega í þessu tilviki. Grétar heldur því fram við okkur að hann sé svo mikill KR-ingur en síðan segir hann annars staðar að í honum slái svo mikið Víkingshjarta. Engu að síður er hann genginn til liðs við Val. Hvernig er hægt að halda þessu fram?," spyr Sigurður furðu lostinn. Róbert Birgir Agnarsson, formaður Víkings, segir að þrjú lið hafi sýnt áhuga á leikmanninum og að þau hafi öll fengið tækifæri til að ræða við hann. "Valur, KR og Keflavík höfðu áhuga og á mánudaginn gáfum við þessum liðum leyfi til að ræða við Grétar. Það er síðan hans að ákveða hvert honum langi mest að fara. Það er ekki okkar mál ef KR og Grétar ná ekki saman," segir Róbert. Fréttablaðið hefur áreiðanlegar heimildir fyrir því að Víkingar fái um eina milljón króna fyrir að lána Grétar til Vals í átta mánuði. Blaðið hefur einnig heimildir fyrir því að heildarkostnaðurinn á bak við félagsskiptin nemi hátt í þrjár milljónir svo að ljóst er að um mjög stórar fjárhæðir er að ræða miðað við íslenskan lánssamning. Grétar skýrði sína hlið málsins í samtali við Fréttablaðið í gær. "Mínar viðræður við KR gengu einfaldlega ekki upp og það finnst mér mjög leiðinlegt, sérstaklega gagnvart Magnúsi Gylfasyni þjálfara sem ég hef verið í miklu sambandi við og hef mikið álit á. En ég er enn þá mikill KR-ingur og ég hef mikinn áhuga á að spila með liðinu í framtíðinni" sagði Grétar við Fréttablaðið. Grétar vildi lítið tjá sig um fjárhagslegar hliðar samkomulagsins nema að peningar hefðu alls ekki vegið þyngst í ákvörðun hans um að ganga til liðs við Val. Í lánssamningi eins er þessum er venjan sú að hið nýja félag taki yfir gildandi samning leikmannsins með tilheyrandi fjárhagskostnaði og greiðslum. Grétar segir að sú hafi verið raunin í þessu tilviki. "Það eina sem ég fór fram á var að lánssamningurinn væri í samræmi við þann samning sem ég er með hjá Víkingi. Það var meiri áhugi hjá Val og það var ekki fyrr en ég tilkynnti KR-ingum að ég væri á leið til Vals sem að þeir fóru að þrýsta á mig um að koma til sín. En á endanum snerist þetta um að ég hafði þegar gefið Völsurum loforð og ég vildi ekki ganga á bak orða minna. Mér þykir það mjög leiðinlegt gagnvart KR því það slær enn þá stórt KR-hjarta í mér. Þetta var erfiðasta ákvörðun lífs míns."