Hugsanleg bótamál vegna Vioxx

Íslenskir gigtarsjúklingar fara hugsanlega fram á skaðabætur vegna notkunar á gigtarlyfinu Vioxx, en í gær voru ekkju manns sem lést í kjölfar notkunar lyfsins dæmdir 16 milljarðar króna í bætur. Viðamikil rannsókn á áhrifum lyfsins á íslenska gigtarsjúklinga er að hefjast. Kviðdómur í Texas í Bandaríkjunum dæmdi í gær ekkju Bandaríkjamanns sem lést í kjölfar notkunar gigtalyfsins Vioxx, 253 milljónir Bandaríkjadala í bætur, en það samsvarar sextán og hálfum milljarði króna. Talið er að þúsundir skaðabótamála fylgi í kjölfarið í Bandaríkjunum. Vioxx hefur verið mikið notað hérlendis þar til í fyrra þar til í fyrra og Landlæknisembættið og Tryggingastofnun ætla nú að láta fara fram rannsókn á aukaverkunum lyfsins. Rannsóknin byggist á lyfjagagnagrunni Landlæknisembættisins og Tryggingastofnunar þar sem skráðar eru upplýsingar um alla þá sjúklinga sem tekið hafa Vioxx og skyld lyf. Nýta á gögnin til að kanna hvort inntaka þessara lyfja auki áhættuna á kransæðastíflu eða heilablóðfalli. Guðmundur Þorgeirsson, sérfræðingur í hjartasjúkdómum, segir að kanna eigi hvort þessi lyfjataka sé áhættuþáttur og hversu sterk hún sé og í hvaða samhengi hún verki. Guðmundur segir að rannsóknin sé um það bil að hefjast og hann bindur vonir við að niðurstöður hennar liggi fyrir innan árs. Áður en niðurstöður hennar liggi fyrir sé erfitt að segja nokkuð um hvort vart hafi orðið aukaverkana hér á landi vegna lyfsins. Guðmundur segir mikilvægt að átta sig á því að öll gigtarlyf hækki blóðþrýsting og geti haft mjög slæm áhrif á nýrnastarfsemi. Þetta mál snúist um óvænta aukaverkun sem sé að lyfið auki líkur á kransæðasjúkdómum. Hann segir enn fremur að nýjustu tölur bendi til þess að Vioxx auki áhættuna um 30-40 prósent og annað og eldra gigtarlyf, Indomedacin, auki hana kannski enn þá meira, 60-70 prósent. Hins vegar auki reykingar áhættuna um 200-300 prósent. Guðmundur segir mögulegt að einhverjir Íslendingar geti leitað skaðabóta vegna notkunar Vioxx þegar niðurstöður rannsóknarinnar liggja fyrir.