Deiluaðilar funda í Finnlandi

Fulltrúar indónesískra stjórnvalda og uppreisnarmanna í Aceh-héraði munu hittast á fundi í Finnlandi í lok næstu viku til þess að reyna að binda enda á þriggja áratuga blóðuga baráttu á Súmötru. Það voru samtök sem Martti Ahtisaari, fyrrverandi forseti Finnlands, er í forsvari fyrir sem áttu frumkvæðið að fundinum og mun Ahtisaari sjálfur reyna að miðla málum. Flóðbylgjan annan dag jóla beindi sjónum manna að deilu stjórnvalda og uppreisnarmanna í Frelsishreyfingu Aceh-héraðs en slegið hefur í brýnu milli hers og uppreisnarmanna þrátt fyrir það neyðarástand sem ríkt hefur í héraðinu og segjast stjórnarhermenn hafa drepið 120 uppreisnarmenn í síðustu viku.