Sérkennilegar kveðjur

"Ég veit ekki betur en það standi fyrir dyrum fundur borgarstjóra með bæjarstjóra í Kópavogi þar sem þetta mál verður rætt og mér finnst þetta sérkennilegar kveðjur fyrir þann fund," segir segir Dagur B. Eggertsson, formaður Skipulagsráðs Reykjavíkur, um þann gjörning Kópavogsbæjar að senda iðnaðarráðuneytinu lögnámsbeiðni til að geta farið með vatnslögn frá borholum í Vatnsendakrikum yfir land Reykjavíkurborgar. Dagur segir að málið sé í faglegu ferli innan óbyggðanefndar þar sem allir málsaðilar gátu lagt fram gögn sín og kröfur. "Þangað til nefndin fellir úrskurð sinn eru svona kröfur ótímabærar." Gunnar I. Birgisson, formaður bæjarráðs Kópavogs, hefur ekki vandað borgarfulltrúum Reykjavíkurlistans kveðjurnar vegna málsins og sagði meðal annars í viðtali við blaðið í gær að þeir þurfi að leita sér sálfræðiaðstoðar vegna minnimáttarkenndar gagnvart Kópavogi. Dagur segir að það sé þekkt að innbæld reiði geti brotist út á ýmsan hátt, þar á meðal gífuryrðum en í þessu máli hafi stóru orðin ekki fallið af hálfu Reykjavíkurborgar. Þá telur Dagur að Gunnar sé að beina sjónum frá forsögu málsins sem sé sú að Kópavogsbúum hafi á sínum tíma verið boðið ódýrt og gott vatn frá Orkuveitu Reykjavíkur. Gunnar hafi ekki viljað una því og áfrýjað málinu í tvígang til sérstakrar matsnefndar sem leiddi til verðhækkunar í bæði skiptin. "Það er því rétt hjá honum að Kópavogsbúar eru að greiða meira fyrir vatnið en ástæða er til en það er út af hans eigin þrákelkni og óþarfa tortryggni gagnvart Orkuveitunni," segir Dagur. Flosi Eiríksson, bæjarráðsmaður í Kópavogi, segir að innan bæjarráðs Kópavogs séu allir sammála um að Vatnsendakriki sé í eigu bæjarins og málið heyri ekki undir kröfulýsingu óbyggðanefndar sem eigi því ekki að fjalla um málið. Hann segir hins vegar að málflutningur Gunnars I. Birgissonar séu Kópavogsbúum ekki til framdráttar og málið eigi að leysa í samvinnu við Reykjavíkurborg. "Þessi fordómafullu og afturhaldssömu ummæli Gunnars eru honum ekki til sóma," segir Flosi.