Amenningsgarður á þaki Magasíns

Íslenskir eigendur Magasíns í Danmörku hafa blásið nýju lífi í hugmyndir um almenningsgarð á þaki verslunarinnar. Á þrjú þúsund fermetra þakinu á að verða hægt að skella sér á skíði, í sólbað eða í bíó. Sagan hófst fyrir tveimur árum þegar styrktarstjóðurinn Realdania hélt samkeppni um nýtingu rýmis í þéttbyggðri Kaupmannahöfn. Meðal verðlaunatillagna var hugmynd tveggja danskra arkitekta um útivistarsvæði fyrir almenning, á þaki Magasin du Nord verslunarinnar. Sjóðurinn ætlaði sjálfur að sjá um helming fjármögnunar, móti sveitarfélaginu og versluninni. Heildarkostnaður var þá áætlaður því sem nemur tæplega þrjú hundruð milljónum íslenskra króna. Dagblaðið Berlingske Tidende skrifar í dag að hugmyndin hafi svo til legið í dvala þar til íslenskir eigendur keyptu Magasín nýlega. Blaðið segir arkitektana tvo eygja nýja von þar sem tilkoma íslenska auðkýfingsins Jóns Ásgeirs Jóhannessonar hafi fært verkefnið nær því að verða að veruleika. Fjármálastjóri Magasíns staðfestir við blaðið að íslensku eigendurnir séu hrifnir af hugmyndinni þótt ekki hafi enn verið tekin endanleg ákvörðun um framkvæmdina. Eitt af því sem þurfi að skoða sérstaklega séu öryggismál vegna aðgangs að garðinum utan afgreiðslutíma verslunarinnar. Arkitektinn Bjarke Ingels segir að útivistarsvæðið geti markað Kaupmannahöfn sérstöðu. Hann segir það þekkjast víða um heim að þök bygginga séu nýtt á þennan hátt og nefnir sem dæmi Galleri Lafayette í París. Þakið á Magasín eru þrjú þúsund fermetrar og hugmyndin að þar verði útibíó, kaffihús, brekka sem nýtist til sleða og skíðabruns á vetrum, boltasvæði og aðstaða til sólbaða. Verkefnið kallast „Háa torg“ en hæsti punktur verður þrjátíu og fimm metrum frá götu. Byggingafulltrúi Kaupmannahafnar segir hugmyndina frumlega og að hún passi inn í fyrirliggjandi skipulag sem hafi verið samþykkt fyrir svæðið í fyrra.