Átján fíkniefnamál í Eyjum

Töluverð rigning var á Þjóhátíðargestum en um fjögurleytið í nótt stytti upp og er komið hæglætisveður í dalnum.  Lögreglumenn í Vestmannaeyjum áttu rólega nótt. Nú hafa alls komið upp átján fíkniefnamál í Eyjum og hefur lögregla haldlagt mest af amfetamíni, en einnig hafa fundist E-töflur og LSD auk kannabisefna. Eru fíkniefnamál þó mun færri en í fyrra þrátt fyrir að mun meira fíkniefnaeftirlit sé á svæðinu og hefur aldrei verið eins öflugt.  Í morgun voru fangageymslur tómar og er það til marks um hve rólegt er yfir gestum Þjóðhátíðar að sögn lögreglunnar í Eyjum.  Þó kom upp eitt ölvunarakstursmál í nótt.  Að sögn hatíðarhaldara er sami fjöldi í Eyjum og hefur verið um helgina, á milli 9 og 10 þúsund manns, en það er að bætast í frá Reykjavík og Bakka þar sem tilboðsverð er á ferðum síðasta daginn samkvæmt hefð. Stærsta númerið í kvöld er Brekkusöngurinn með Árna Johnsen auk þess sem Bubbi Morthens mun stíga á stokk. Á Akureyri eru um 10-12 þúsund gestir að sögn hátíðarhaldara. Ekkert nýtt hefur komið upp á að sögn lögreglu og fíkniefnamálin ellefu og meiðslin eftir slagsmálin í nótt, þar sem fimm voru fluttir á slysadeild, voru minniháttar. Skýjað er í bænum en hlýtt og nokkrir dropar féllu í morgun.  Á Neskaupsstað er sami fjöldi og verið hefur , 2-3 þúsund manns, og segir lögregla ekkert að frétta fyrir utan smá umferðartafir. Veður er þokkalegt og 13 stigi hiti Í Galtalæk er sömu sögu að segja en þar eru nú um 2500 manns.  Bongóblíða hefur veruð fyrir austan alla helgina Á Álfaborgarséns í Borgarfirði eru nú um 3-400 manns og verður varðeldur og hópsöngur í kvöld. Annað eins var í Atlavík þar sem allt er troðið, 4-500 manns voru í Svartaskógi sl. nótt og um 200 í Hallormsstað. Á Síldarævintýrinu á Siglufirði hefur verið svipaður fjöldi alla helgina, um 3000 manns, og ekkert teljandi vesen á fólki. Mígandi rigning hefur verið við og við í dag.