Aðeins heillaóskir ennþá

"Það hefur enginn haft samband við mig af þessu óánægða fólki," segir Fríða Regína Höskuldsdóttir, nýr skólastjóri í Landakotsskóla um deilurnar sem þar hafa verið. "Enn sem komið er hef ég ekkert annað fengið en hamingjuóskir." Hún segist ekki taka þeirri gagnrýni sem komið hefur fram í fjölmiðlum persónulega. Regína vill þó ekki gera lítið úr deilunum. "Það þarf að taka á þessu. En enn sem komið er hef ég mjög lítinn skilning á því um hvað þetta snýst og veit aðeins það sem ég hef lesið í fjölmiðlum. Ég veit ekki einu sinni hverjir það eru sem eru óánægðir." Regína segist ætla að taka á deilumálunum með opnum huga. Hún ætlar að láta það vera eitt af sínum fyrstu verkum að bjóða foreldrum barna í skólanum til fundar. "Kennararnir mæta síðan til starfa um miðjan ágúst, en ég vona að einhverjir þeirra gefi sig fram við mig fyrr til að ræða málin."