Kennarar óánægðir með vinnuveitand

Í vinnustaðagreiningu á grunnskólum og Fræðslumiðstöð Reykjavíkur kemur fram að 26 prósent svarenda sögðust ekki ánægð með Reykjavíkurborg sem vinnuveitanda og eru starfsmenn grunnskóla borgarinnar því óánægðari með vinnuveitanda sinn en starfsmenn annarra fyrirtækja. Óánægjan hefur aukist frá 2002 og eru kennarar óánægðri en aðrir starfsmenn skólans. Þá kemur einnig fram að starfsfólk grunnskóla og Fræðslumiðstöðvar er ánægðari með ýmislegt sem snýr að vinnuumhverfi og vinnuanda en starfsmenn samanburðarfyrirtækja. Heildarniðurstaðan fyrir grunnskólana er heldur betri en hjá öðrum fyrirtækjum að jafnaði. Einnig er heildarniðurstaðan nokkuð betri en í samskonar greiningu sem framkvæmd var árið 2002. Gerður Óskarsdóttir, sviðstjóri menntasviðs Reykjavíkurborgar, segist vera ánægð með niðurstöður greiningarinnar, en að sjálfsögðu komi fram þættir sem þyrfti að vinna betur í. Sú fullyrðing sem best kemur út að þessu sinni er hvort starfsmenn grunnskóla og fræðslumiðstöðar telja sig leggja mikið á sig til að þjóna nemendum og foreldrum þeirra sem best. Sú fullyrðing sem fær lægstu einkunnina er hvort laun eru sanngjörn miðað við ábyrgð í starfi. Þá er áberandi í greiningunni að starfsmenn í borgarhluta 1, þar sem finna má Grandaskóla, Hagaskóla, Melaskóla og Vesturbæjarskóla, hafa neikvæðasta matið á því hversu vel starfsmönnum finnst að vinnustaðnum sé stjórnað, markmiðin eru sögð óskýrust, þar telja starfsmenn vera mesta ágreininginn milli starfsmanna og starfsandinn er lakastur. Af 107 spurningum og fullyrðingum í könnuninni var 22,1 prósent svara greint svokallað í styrkleikabil sem er jákvætt fyrir starfsemi skólanna, 41,6 prósent svara voru greind í starfshæft bil sem hvorki er talið hvetja né letja starfsfólk við dagleg störf. 36,4 prósent svara voru greind í aðgerðabil, sem er neikvætt fyrir starfsemi skólanna. Þátttakendur voru starfsmenn fræðslumiðstöðva, grunnskóla og sérskóla Reykjavíkur. Gallup gerði vinnustaðagreininguna í apríl og maí á þessu ári.