Gömul stórveldi kljást í kvöld

Gamla körfuboltastórveldið Boston Celtics tekur á móti gömlu erkifjendunum í Los Angeles Lakers í NBA-deildinni í kvöld. Þess má geta að fríður hópur fólks lagði upp í hópferð á þennan leik en liðin tvö eiga sér fjölmarga unnendur á Íslandi. Antoine Walker gekk nýlega til liðs við Celtics á nýjan leik en sá hafði verið á töluverðu flakki undanfarin ár. Hann sameinaðist Paul Pierce á ný en saman þóttu þeir mynda eitt skæðasta tvíeyki deildarinnar. Kobe Bryant er orðinn heill heilsu og mun vafalítið láta til sín taka gegn Celtics í kvöld. Liðin mættust síðast í Los Angeles og þá höfðu heimamenn betur, 104-95. Það var Lamar Odom sem að fór fyrir Lakers í þeim leik og skoraði 21 stig. Liðin eru á mjög svipuðu róli í deildinni en Boston hefur unnið 29 leiki og tapað 28 en Lakers er með 29 sigra og 28 töp. Það er því einhver bið á að þessi tvö lið muni ná fyrri styrk og teljast til stórvelda eins og á árum áður.