Margt býr í andlitinu

Andlitsfallið ræður miklu um hvernig við veljum okkur vini og maka á ómeðvitaðan hátt. Í það minnsta benda nýjar rannsóknir í þessa átt samkvæmt netútgáfu BBC. Svo virðist sem fólk treysti þeim betur sem hafa svipað andlitslag og það sjálft. Þegar kemur að kynferðislegri hrifningu snýst dæmið hins vegar við, við löðumst að fólki sem hefur ólíka andlitsdrætti og við sjálf. Vísindamenn segja ástæðuna einfalda. Svipað andlitsfall bendir til skyldleika og venjulega treystir fólk skyldmennum sínum betur en ókunnugum. Mannfólkið forðast á hinn bóginn að eðla sig með slíkum einstaklingum til að koma í veg fyrir mögulega úrkynjun. Rannsóknin var gerð af skoskum vísindamönnum en þeir sýndu 144 kanadískum stúdentum myndir af alls kyns fólki. Stúdentarnir vissu hins vegar ekki að búið var að breyta myndunum í tölvu svo að andlit fólksins líktust stúdentunum meira. Önnur nýleg bresk rannsókn sýnir að þorri kvenna kýs karlmenn með mjúka og allt að því kvenlega andlitsdrætti. Könnunin var gerð í Liverpool-háskóla. Nokkur hundruð stúdentar skoðuðu myndir af tölvugerðum andlitum. Í undirmeðvitundinni tengja konur mjúka menn við ástúð og stöðugleika og telja þá því áreiðanlegri uppalendur. Konur sem aftur á móti álíta sig mjög aðlaðandi vilja hins vegar frekar menn með sterkt andlitsfall þrátt fyrir innbyggða hættu á að þeir haldi fram hjá og yfirgefi ungviðið. Eðlisávísunin segir þeim að erfðamengi karlmannlegra manna sé afar gott og áhættunnar fyllilega virði. Þetta á ekki síst við þegar þær hafa egglos en á öðrum tímum tíðahringsins hallast þær aftur meira að mjúku mönnunum. Enn önnur rannsókn sem BBC segir frá sýnir að almennt telji karlar þær konur sem eru í fylgd manna með sterka andlitsdrætti vera meira aðlaðandi en þær sem eru í slagtogi með mjúku mönnunum.