Gjaldfrjáls leikskóli á Súðavík

Á vef Bæjarins besta á Ísafirði kemur fram að Fræðslu- og tómstundanefnd Súðavíkurhrepps og hreppsnefnd Súðavíkur samþykktu í gær formlega nýja gjaldskrá fyrir leikskólann í Súðavík. Með hinni nýju gjaldskrá verður leikskólinn í raun gjaldfrjáls. Er Súðavíkurhreppur fyrst sveitarfélaga á Íslandi til þess að stíga það skref að gera allt nám gjaldfrjálst. Í hinni nýju gjaldskrá kemur fram að ekkert gjald verður innheimt fyrir dvöl í leikskólanum fyrir allt að átta tíma á dag. Eins og áður munu elstu börn leikskólans njóta samkennslu með yngstu börnum grunnskólans en Súðvíkingar voru frumkvöðlar að slíkri samkennslu hér á landi. Í stefnumótun Súðavíkurhrepps sem unnin var í kjölfar íbúaþings kom fram að stefna bæri að gjaldfrjálsum leikskóla og nú hefur sú stefna verið formlega staðfest með samþykki sveitarstjórnar. Þetta nýja fyrirkomulag tekur gildi 1. september.