Hjarðmennska úti á miðjum firði

"Þorskurinn er orðinn svo gjæfur að maður getur klappað honum út á miðjum firði," segir Jón Þórðarson einn af umsjónarmönnum hafrannsóknar á Arnarfirði sem Hafrannsóknastofnunin stendur fyrir. Rannsóknin, sem hófst í apríl síðastliðnum, felst í því að þorskurinn í firðinum er fóðraður á ákveðnum svæðum með loðnu og þannig hændur að þeim svæðum svo hann fari ekki innar í fjörðinn til að éta rækjuna sem þar heldur til. "Það er mikið í húfi að vernda þennan rækjustofn í Arnarfirði þar sem þetta er eini rækjustofninn sem eftir er hér við land sem heldur sig innan fjarðar, allsstaðar annarsstaðar hefur þorskurinn étið alla innfjarðarrækjuna," segir Björn Björnsson, fiskifræðingur hjá Hafrannsóknastofnuninni og verkefnisstjóri. Í fyrstu var þorskinum gefið að éta daglega en nú fær hann einungis þrisvar í viku. Loðnunni er slakað niður í stórum netapokum og eru þrjú til fjögur hundruð kíló í hverjum poka. Pokinn er látin dóla á tíu metra dýpi meðan þorskurinn gæðir sér á. Einnig er tæplega sex kílómetra löng lína með loðnu hangandi á í litlum pokum lögð yfir þveran fjörðinn svo þorskurinn sem ekki hefur ratað á gjafasvæði fari ekki inn fjörðinn til að gæða sér á rækjum. Tvö markmið eru með þessari rannsókn því fyrir utan það að halda þorskinum frá rækjunni vilja rannsakendur sjá hvort hægt sé að mynda einskonar þorskahjarðir og enn fremur hvort hægt sé að ala smáþorskinn upp í stærri og verðmætari fisk. Þegar honum yrði svo komið í ákjósanlega stærð og holdarfar yrði hann svo veiddur. Þar sem hann er afar gjæfur í þessum hjörðum er vandinn hægur að moka honum upp. "Nú þegar er þorskurinn farinn að halda til í fjórum hjörðum í Arnarfirði þannig að hér er á ferðinni fyrsti hjarðbúskapurinn í Íslandssögunni sem stundaður er á sjó," segir Jón Þórðarson. Í haust verður svo rækjustofninn kannaður og metið hvort verkið hafi borið tilætlaðan árangur.