Sjávarskart Herdísar

Herdís Egilsdóttir er sennilega þekktust fyrir skrif sín um ýmsar persónur eins og litla Pappírs Pésa og Skessuna í fjallinu. Hún á þó nóg annað í pokahorninu og hefur til dæmis verið að dunda sér við að hanna dásamlega flotta skartgripi sem hressa upp á hvaða flík sem er.

"Alla mína ævi hef ég verið viðkvæm fyrir efni til að hanna úr. Mátti aldrei sjá spýtu eða spotta án þess að langa til að búa eitthvað til úr því," segir Herdís kát. Hún hannar armbönd, hálsmen og belti úr roði og myndu munirnir sóma sér vel í flottri hönnunarbúð en Herdís selur þó vörurnar ekki í búðum.

"Mörg síðustu ár hef ég verið hrifin af leðri en nú er ég komin í roðið. Ég kalla þetta Sjávarskart og hanna hvern skartgrip fyrir sig svo það eru engir tveir eins. Ég sel þá bara sjálf og vil ekkert setja þetta í búðir, þetta er svo persónulegt. Fólk getur bara sett sig í samband við mig ef það hefur áhuga á vörunum, ég á alltaf svolítinn lager og er líka alltaf til í að búa til nýtt."

Herdís vinnur með roð af laxi, hlýra og nílarkarfa og segir stóra kostinn við roðið vera að það sé svo létt. "Þetta mega vel vera stórir gripir því maður finnur ekki fyrir þessu. Auk þess er það kostur við svona náttúruleg efni að maður svitnar ekki undan þeim, eins og plastinu til dæmis. Skartið sjálft er unnið úr laxi því hann er svo sterkur og svo fóðra ég með hlýranum sem er mýkri."

Hún hefur þó ekki gefið skriftirnar upp á bátinn og gaf nýlega út barnabókina Draumar Marglyttunnar. "Í stuttu máli sagt er þetta ævintýri fyrir börn á öllum aldri. Þarna fer fram barátta góðs og ills í hafinu og er bókin myndskreytt af Erlu Sigurðardóttir sem gerði fyrir mig yndislegar myndir. Ég virðist vera öll í sjónum. Það er líka gaman að segja frá því að ég er alin upp við sjóinn. Ég bjó á Húsavík á yngri árum og lék mér í fjörunni svo ég hef ekki langt að sækja þennan sjávaráhuga."

Þeir sem hafa áhuga á að vita meira um hönnun Herdísar geta sent póst á netfangið lifsleikni@lifsleikni.is.