Fjöldi ótryggðra bíla í umferðinni

Það sem af er árinu hafa tryggingafélögin fellt niður á milli eitt og tvö þúsund bifreiðatryggingar þar sem eigendur bifreiðanna hafa ekki greitt af þeim tryggingar. Í morgunþætti Fréttablaðsins á Talstöðinni í gær sagði Hjálmar Sigurþórsson, framkvæmdastjóri tjónasviðs hjá Tryggingamiðstöðinni, að fyrirtækið felli niður tryggingar þeirra sem ekki greiða þær. "Það sem af er þessu ári höfum við fellt niður um fimm hundruð tryggingar þannig að það þarf ekki mikinn reiknimeistara til að sjá að það eru fjölmargir sem aka ótryggðir í umferðinni. Ég hef ekki tölur um hversu margir hafa gengið frá sínum málum eftir að við felldum niður tryggingarnar en þetta er magnaður fjöldi sem við erum að setja í þennan leiðinlega farveg," sagði Hjálmar. Hann sagði að sumir kæmu sínum málum í lag eftir að til slíkra aðgerða væri gripið og lögreglan klippti af öðrum. Hjá hinum stóru tryggingafélögunum fengust upplýsingar um að svipaðan fjölda væri að ræða og hjá Tryggingamiðstöðinni. "Það er grafalvarlegur hlutur að keyra um á ótryggðum bíl og ef við lendum í því að greiða tjón þá eigum við endurkröfu á hendur tjónvaldi, hvort sem er eiganda eða ökumanni ef annar ekur bílnum en eigandinn. Við sækjum það sem við greiðum tjónþolanum af fullri hörku ef viðkomandi hefur ekki tryggingu," segir Jón Ólafsson hjá Alþjóðlegum bifreiðatryggingum á Íslandi. Hann segir sitt félag greiða tjónþola bætur hvort sem er vegna tjóns á bifreið eða vegna líkamstjóns hafi tjónvaldur ekki lögbundna tryggingu og upphæðirnar skipti tugum milljóna á hverju ári. "Það er skylda okkar samkvæmt lögum að greiða bætur en þegar fjórar vikur eru liðnar frá því að tryggingu er sagt upp þá færist ábyrgðin yfir á okkur. Það er kvöð á tryggingafélögum sem selja ökutækjatryggingar að vera aðilar að alþjóðlegum bifreiðatryggingum þannig við ábyrgjumst greiðslur til tjónþolans en við gerum alltaf endurkröfu á þann sem olli tjóninu hafi hann ekki haft tryggingu," segir Jón.