Einkafyrirtæki byggir hús og skóla

Einkafyrirtæki mun, ef allt gengur eftir, byggja 400 íbúða hverfi í Mosfellsbæ. Það mun einnig leggja þar götur, byggja skóla og leikskóla. Formaður bæjarráðs og eigandi Leirvogstungu skrifuðu undir viljayfirlýsinguna í morgun. Hugmyndin er ný af nálinni og það voru eigendur Leirvogstungu sem áttu frumkvæðið að henni. Þó að enn hafi ekkert verið endanlega ákveðið eru forystumenn Mosfellsbæjar mjög bjartsýnir og formaður bæjarráðs, Haraldur Sverrisson, segir mikla jákvæðni ríkja í garð hugmyndarinnar að byggingu hins nýja hverfis. Hann bendir á að breyta þurfi aðalskipulagi og svæðisskipulagi af þessum sökum og svo deiliskipuleggja landið. Vonast sé til að hægt verði að hefja uppbyggingu næsta vor, en gert sér ráð fyrir að uppbyggingin taki fjögur ár. Þetta gerist svo sem ekki á einni nóttu en búið sé að undirrita viljayfirlýsingu um að gera þetta með þessum hætti. Gangi allt að óskum verður því risið nýtt hverfi með 400 íbúðum um mitt ár 2010. Landið undir íbúðirnar markast af Leirvogsá að norðanverðu og Köldukvísl að sunnanverðu. Uppbygging hverfisins verður Mosfellsbæ að kostnaðarlausu þar sem Leirvogstunga sér alfarið um uppbyggingu hverfisins og þar með talið lagningu stofnbrautar og brúar. Einkafyrirtæki hefur ekki áður samið við sveitarfélag á þessum nótum og má því segja að um nýstárlega hugmyndafræði sé að ræða. Og það sem meira er þá mun Leirvogstunga líka fjármagna byggingu skóla og leikskóla á svæðinu. Björn Guðmundsson, eigandi Leirvogstungu ehf., segir að skólinn verði bæði byggður og þá verði talvert lagt til hans til Mosfellsbæjar. Gert er ráð fyrir að áætlana-, skipulags- og byggingarkostnaður ásamt vegagerð og fleiru sem tengist framkvæmdinni muni nema ríflega tveimur milljörðum króna. Íbúðirnar 400 munu skiptast í einbýlishús, parhús og raðhús enda er eftirspurn eftir sérbýli mikil í Mosfellsbæ eins og annars staðar á höfuðborgarsvæðinu. Björn segir listann yfir þá sem óski eftir að kaupa á svæðinu orðin ansi langan og hann lengist enn. Það sé talsvert mikil eftirspurn eftir sérbýli.