Fundargerð orðin opinber

Fréttablaðið birtir í morgun orðréttan texta upp úr fundargerðum utanríkismálanefndar Alþingis. Þingflokkur Samfylkingarinnar hefur farið fram á að trúnaði verði aflétt af fundargerðum nefndarinnar og ríkisstjórnarinnar þar sem fjallað var um aðdraganda ákvörðunarinnar um stuðning Íslands við innrásina í Írak og um að Ísland skyldi vera sett á lista hinna staðföstu þjóða. Fundargerðir ríkisstjórnar eru undanþegnar almennum upplýsingarétti. Hins vegar er ríkisstjórn heimilt að taka sjálf ákvörðun um að birta slík gögn. Í 24. grein þingskaparlaga segir að nefndarmenn utanríkismálanefndar skuli einungis vera bundnir trúnaði um þá vitneskju sem þeir fá í nefndinni ef formaður eða ráðherra kveða svo á. Allar fundargerðir eru merktar sem trúnaðarmál. Ljóst er þó að formaður, ráðherra og nefndin sjálf geta sameiginlega aflétt trúnaði af fundargerðum. Fréttablaðið hefur hins vegar tekið ómakið af ráðamönnum með aðstoð einhvers eða einhverra nefndarmanna. Í blaðinu í dag kemur fram að Þórunn Sveinbjarnardóttir, þingmaður Samfylkingarinnar, hafi óskað eftir að fá að vita þann 21. mars 2003, þremur dögum eftir að Bandaríkjastjórn var tilkynnt um stuðninginn, hvernig Ísland hefði lent á lista yfir þrjátíu staðföst ríki. Halldór Ásgrímsson hafi svarað því til að það hefði gerst í samtölum milli embættismanna í forsætisráðuneyti og utanríkisráðuneyti þann 18. mars. Rannveig Guðmundsdóttir gagnrýndi harðlega á fundinum að svo stefnumótandi ákvörðun hefði verið tekin án samráðs við nefndina og undir það tók Steingrímur J. Sigfússon og sagði að ekkert hefði komið fram sem hefði gefið ástæðu til þess að Ísland myndi styðja hernaðaraðgerðir gegn Írak án undangenginnar ályktunar Öryggisráðs Sameinuðu þjóðanna. Ekki náðist í Sólveigu Pétursdóttur, formann utanríkismálanefndar, fyrir fréttir. Þórunn Sveinbjarnardóttir, þingmaður Samfylkingarinnar, segist ekki hafa lekið þessum upplýsingum í fjölmiðla. Hún segir að það sé hábölvað að upplýsingarnar séu komnar fram á þennan hátt því þetta þýði að bæði aðal- og varafulltrúar í utanríkismálanefnd liggi undir grun. Þórunn segir enn fremur að hún hefði fremur kosið að trúnaði hefði verið létt af upplýsingunum eins og þingflokkur Samfylkingarinnar hefði farið fram á í gær. Sú ákvörðun hefði þá átt að vera sameiginleg en nú séu upplýsingarnar komnar fram og þjóðin geti kynnt sér þær og dregið sínar ályktanir.