Tímamót í sögu fátækustu þjóðanna

Fjármálaráðherrar átta helstu iðnríkja heims komust að samkomulagi í gær um að fella niður 2.600 milljarða skuld fátækustu ríkja heims. John Snow, fjármálaráðherra Bandaríkjanna, sagði samkomulagið sögulegt. Átján ríki munu strax njóta niðurfellingar skulda sinna við Alþjóðabankann, Alþjóðagjaldeyrissjóðinn og Afríska þróunarbankann. Önnur tuttugu ríki gætu fengið skuldir sínar niðurfelldar ef þau uppfylla skilyrði um góða stjórnunarhætti og takast á við spillingu heima fyrir. Hjálparstofnanir segja að samkvæmt samkomulaginu muni löndin átján spara um 97 til 129 milljarða á ári í endurgreiðslur skulda, sem Gordon Brown, fjármálaráðherra Bretlands, sagði að yrði að nota til að byggja upp heilsugæslu, sjúkrahús, skóla á öllum skólastigum og stofnanir samfélagsins. Fulltrúar hjálparstofnana bentu þó á að þessi samningur gerði lítið fyrir milljónir manna í að minnsta kosti fjörutíu öðrum ríkjum, sem einnig þyrftu á niðurfellingu skulda að halda. Bretar ætla einnig að reyna að sannfæra leiðtoga hinna sjö helstu iðnríkjanna á fundi G8 í júlí um að auka þróunaraðstoð um 3.200 milljarða árlega til að berjast gegn fátækt. Um það ríkir ósátt meðal ríkjanna átta. Bandaríkin og Japan hafa hafnað tillögum Breta og kjósa frekar tvíhliða hjálparsamninga við þróunarríkin. Frakkar vilja að sérstakur skattur verði lagður á alþjóðlegt flug, sem notaður verði til þróunaraðstoðar. Þá á einnig eftir að ná viðskiptasamkomulagi við þróunarríkin, en viðræður um það hófust í Doha árið 2001. Samkomulagið á að draga úr ríkisstyrkjum hinna ríkari landa til framleiðslugreina, draga úr tollum og öðrum hindrunum við alþjóðleg viðskipti og nota þannig viðskipti til að aðstoða þróunarríkin. Samkvæmt samkomulaginu munu iðnríkin átta endurgreiða Alþjóðabankanum og Afríska þróunarbankanum vegna niðurfellingar skuldanna. Einnig var samþykkt að koma til móts við Alþjóðagjaldeyrissjóðinn, að því leyti sem hann getur ekki mætt tapinu með eigin sjóðum.