Neitar að ósamræmi sé í gögnum

Sigurður Þórðarson ríkisendurskoðandi segir aðspurður að engar sérstakar ástæður séu fyrir því að stornunin hafi ekki í lok apríl hafið rannsókn á hæfi Halldórs Ásgrímssonar við sölu ríkisbankanna, þegar stofnunin fékk upplýsingar um hugsanlegt vanhæfi hans. Stofnunin hafi verið að vinna í þessu máli síðan þá. Sigurður segir einnig að þrátt fyrir að þessar upplýsingar um eignarhlut Skinneyjar-Þinganes í Hesteyri hafi komið fram í fréttum Fréttablaðsins, Stöðvar 2 og í úttekt Frjálsrar verslunar í nóvember og desember 2002, hafi Ríkisendurskoðun ekki haft þær upplýsingar undir höndum.  Sigurður segir því ekki rétt að ósamræmi sé í gögnum Ríkisendurskoðunar, eins og kom fram í Fréttablaðinu í gær. Þó svo að samantekt Ríkisendurskoðunar hafi verið dagsett 7. júní sé hún spurningar og svör sem komu fram á fundi með fjárlaganefnd 28. apríl. Það hafi svo verið í kjölfar þess fundar sem upplýsingar komu fram sem birtast á minnisblaði, einnig dagsett 7. júní, sem leiðir til þess að Ríkisendurskoðun ákveður að rannsaka hvort Halldór Ásgrímsson hafi verið vanhæfur til að taka þátt í sölu ríkisbankanna vegna eigendatengsla hans og fjölskyldu hans í gegnum Hesteyri, sem framkvæmdanefnd var ekki gefin upp. Eins og segir í minnisblaði Ríkisendurskoðunar gerði Kristinn Hallgrímsson grein fyrir fjárfestum í S-hópnum fyrir framkvæmdanefnd og sagði Hesteyri í eigu Kaupfélags Skagfirðinga. Síðan segir í minnisblaðinu að þessi fullyrðing sé "reyndar ekki alveg nákvæm", því þó svo það hafi áður verið í eigu kaupfélagsins hafi Hesteyri verið notað í tengslum við kaup Kaupfélagsins og Skinneyjar-Þinganess hf. á stórum hluta í Keri hf., eða 22,53 prósentum, þann 16. ágúst 2002 en nafnvirði bréfanna hafi verið 223 milljónir. Ker var einn af leiðandi fjárfestum S-hópsins í undirbúningi að kaupum á Búnaðarbankanum, en Hesteyri seldi hlut sinn í Keri um miðjan nóvember 2002.