Verðmerkingum á Laugavegi ábótavant

Allmargar verslanir við Laugaveg verðmerkja ekki vörur í gluggum sínum eins og lög kveða á um. Ástæðurnar eru margvíslegar en fyrst og fremst að skipt sé svo oft um vörur í gluggum þessa dagana að það sé ekki heiglum hent.

Talsvert vantar upp á að verslanir við Laugaveg í Reykjavík fari að settum reglum hvað varðar verðmerkingar í gluggum verslana. Kveða reglurnar skýrt á um að öllum söluaðilum sé skylt að verðmerkja allar vörur og þjónustu með söluverði. Á það ekki síst við um vörur í verslunargluggum en mikið vantar upp á að svo hafi verið á Laugaveginum við úttekt Fréttablaðsins.

Starfsfólk og eigendur verslana bera því við að þessi árstími sé sérstaklega slæmur hvað þetta varðar. Margir eigendur skipti um og breyti útstillingum sínum oftar á þessum tíma og fram að jólum en annars er eðlilegt og það geti útskýrt af hverju verðmerkingum sé áfátt.

Aðrir seljendur smávöru hvers konar bentu einnig á að ekki væri auðvelt að verðmerkja margar slíkar vörur með góðu móti án þess að skyggja á vöruna sjálfa. Aðrir voru þó á því að verðmerkingar í gluggum væru aðeins enn einn hluti af sjálfsagðri þjónustu. Góð tilboð í gluggum fengi fólk frekar inn í verslunina en ella og svöluðu forvitni allra þeirra sem leið ættu um á lokunartíma.

Fréttablaðið gerði svipaða könnun í Kringlunni fyrr í haust og reyndust verslanir þar að mestu hafa sitt á hreinu. Verið getur að verð og vörur breytist hraðar þegar líða fer að jólum og það hafi áhrif á samanburð þarna á milli.