Rannsókn sögð hafin á leka

Hafin er rannsókn á því innan raða bandarísku leyniþjónustunnar CIA hver kunni að hafa lekið upplýsingum til fjölmiðla um að hún reki leynifangelsi erlendis. Á fréttavef breska útvarpsins BBC er þetta haft eftir ónafngreindum embættismönnum í Washington.

Dagblaðið The Washington Post greindi frá því í síðustu viku að það hefði heimildir fyrir því að CIA ræki slík fangelsi meðal annars í ónefndum Austur-Evrópulöndum. Fulltrúar CIA og Bandaríkjastjórnar hafa hvorki viljað staðfesta né hrekja ásakanirnar.

Að sögn fréttaritara BBC vestra hefur þessi þögn ráðamanna ýtt undir vangaveltur um hin meintu leynifangelsi.