Palestínumenn byrjaðir að syrgja

Mikil ringlureið er meðal Palestínumanna sem vita vart hvort Jasser Arafat, leiðtogi Palestínu, er lífs eða liðinn. Egyptar ætla að halda jarðarför Arafats og almenningur í Palestínu syrgir hann þegar, og þó er fullyrt að hann sé enn á lífi og í dái í París. Mjög er nú þrýst á helstu leiðtoga heimastjórnar Palestínu heimafyrir um að eyða þeirri óvissu sem ríkir um ástand Arafats en frá því í síðustu viku hafa bæði borist fréttir um andlát hans og um að hann liggi alvarlega veikur á sjúkrahúsi. Arafat, sem er 75 ára, var fluttur frá Ramallah á Vesturbakkanum á hersjúkrahús í París, 29. október síðastliðinn en læknar staðfestu í gær að blætt hefði inn á heilann í honum og hann væri í djúpu dái. Ennfremur sögðu þeir að hann ætti í mesta lagi nokkrar klukkustundir eftir ólifaðar. Í morgun var haft eftir æðstaklerki múslima á heimastjórnarsvæðunum, sem kominn er til Parísar til að vitja Arafats, að hann væri enn á lífi. Fregnir herma að klerkurinn muni leggja blessun sína yfir það að öndunarvél sem Arafat er tengdur verði tekin úr sambandi. Nabil Shaath, utanríkisráðherra heimastjórnar Palestínu, vísaði á bug öllum kjaftasögum um andlát leiðtogans í gær. Heimildir innan heimastjórnarinnar sögðu í morgun að tilkynning um andlát hans kynni að verða send út í dag og að þegar væri farið að undirbúa útför hans í Kaíró í Egyptalandi og greftrun hans við höfuðstöðvar hans í Ramallah. Arafat hefur verið leiðtogi Palestínu í meira en fjóra áratugi en helsti draumur hans hefur verið að stofna sjálfstætt ríki. Óttast margir að mikil ólga og átök verði meðal Palestínumanna við fráfall hans.