Misvísandi upplýsingar um Arafat

Fréttir berast bæði af því að Jasser Arafat, forseti Palestínu, sé látinn og að hann sé lifandi en að heilsu hans hafi hrakað verulega. Reuters-fréttastofan hefur eftir áreiðanlegum heimildum úr innsta hring Arafats og einnig frá háttsettum palestínskum embættismanni að hann sé látinn. Enn annar embættismaður sagði við fréttamann Reuters að von væri á formlegri yfirlýsingu um andlát hans bráðlega. Skömmu fyrir fréttir bárust hins vegar yfirlýsingar frá hersjúkrahúsinu franska í París, þar sem Arafat leitaði lækninga, að hann væri ekki látinn. Þá sagði utanríkisráðherra Palestínu í samtali við CNN-sjónvarpsfréttastofuna fyrir stuttu að hann væri ekki látinn og engin ákvörðun lægi fyrir um að taka öndunarvél, sem haldi í honum lífinu, úr sambandi. Hann bar ennfremur til baka sögusagnir um að Arafat hefði verið byrlað eitur.