Fyrstu norrænu tónlistarverðlaunin

Íslendingar og Finnar voru fjarri góðu gamni á fyrstu norrænu tónlistarverðlaununum sem haldin voru í Ósló í gærkvöldi. Norska hljómsveitin A-ha fékk heiðursverðlaun ásamt bresku poppstjörnunni Robbie Williams. Almenningur í Danmörku, Noregi og Svíþjóð greiddi atkvæði til tónlistarmanna í þremur hlutum: með tilliti til hverjir hefðu staðið sig best á árinu í heimalandinu, á Norðurlöndunum og á heimsvísu. Vinsælasta hljómsveitin í Skandinavíu var valin danska sveitin Outlandish. Margir Íslendingar kannast við norsku Idol-stjörnuna Kurt Nilsen en hann var valinn besti nýliðinn og besti tónlistarmaðurinn í heimalandinu. Heiðursverðlaun þessara fyrstu norrænu tónlistarverðlauna fóru einnig til gestgjafanna því norska sveitin A-ha var verðlaunuð fyrir glæstan tuttugu ára feril. Í alþjóðlegu deildinni var írska strákahljómsveitin Westlife valin sú besta, besti tónlistarmaðurinn í kvenflokki var bandaríska söngkonan Anastacia og landi hennar Usher var valinn besti tónlistarmaðurinn í karlaflokki. Hátíðin fór fram í Spektra-höllinni í Ósló í gærkvöldi og var í sameiginlegri útsendingu einkastöðvanna TV2 í Danmörku, TV2 í Noregi og TV4 í Svíþjóð. Á vefsíðu norsku stöðvarinnar segir framkvæmdastjóri hátíðarinnar mikla kosti við þetta fyrsta samstarfsverkefni stöðvanna. Hann telur að tónlistarmenn nái til mun fleiri skandinavískra eyrna og augna með þessum hætti en á evrópsku tónlistarverðlaunum MTV-stöðvarinnar. Eftir sameiginlegt upphaf sendi hvert landanna út hálftíma upptöku frá fimmtudagskvöldinu en þá voru kynnt úrslit í hverju landi fyrir sig. Hátíðinni í gær lauk svo með sameiginlegri útsendingu þar sem hápunkturinn voru stórstjörnurnar Tina Turner og Robbie Williams, sem tók einmitt við alþjóðlegum heiðursverðlaunum úr hendi Norðmannanna Sissel Kirkebo og Morten Harket. Við það tækifæri lýsti Williams yfir furðu sinni á útliti Harkets og sagði að það væri eins og hann eldist ekki. Hægt er að hlusta á fréttina með því að smella á hlekkinn hér að neðan.