Íslendingar grófir, segja Svíar

Laugardalsvöllur er ekki öruggur staður til að vera á ef marka má ummæli sænsku landsliðsmannanna í sænskum fjölmiðlum eftir leikinn gegn Íslendingum í fyrrakvöld. Fara þeir nokkrir hörðum orðum um grófan leik íslenska liðsins og fer markvörðurinn Andreas Isaksson þar fremstur í flokki. Segir hann íslensku strákana hafa spilað af tómum ruddaskap með það eitt fyrir augum að valda meiðslum hjá Svíum. Sænski þjálfarinn og leikmenn allir voru sammála um að íslenska liðið hafi spilað stífan og á köflum grófan leik. Heiðar Helguson lét enn einn markvörðinn finna fyrir sér þegar hann lenti í samstuði við Isaksson á sjöttu mínútu í leiknum. Lá Isaksson eftir og varð síðar að skipta honum út af vegna meiðsla í læri. Er óvíst hvort hann spilar með liði sínu, franska liðinu Rennes, á laugardaginn kemur. Var hann einn af fáum sænskum leikmönnum sem voru sjáanlega reiðir í garð Íslendinga eftir leik liðanna í fyrrakvöld. "Það er eitt að spila af hörku og láta finna fyrir sér en Íslendingarnir fóru langt út fyrir þau mörk." Varnarmaðurinn Alexander Östlund tekur í sama streng og finnst eins og Íslendingarnir hafi farið í leikinn með það fyrir augum að koma sænsku leikmönnunum á spítala. "Þeir fóru tvífóta í allar tæklingar og skipti þá engu hvað fyrir varð. Svona á ekki að spila fótbolta heldur verður alltaf að sýna andstæðingnum virðingu og það vantaði alveg upp á það hjá íslenska liðinu." "Ég átta mig ekki á hvað sænsku leikmennirnir eru að fara með þessum yfirlýsingum," segir Ásgeir Sigurvinsson landsliðsþjálfari þegar ummælin voru borin undir hann. "Ef eitthvað var vantaði meiri hörku í íslenska liðið og þá kannski hefðu úrslitin orðið önnur. Hins vegar má segja að í byrjun síðari hálfleiks tóku menn harðar á Svíunum en verið hafði fram að því en yfir heildina fannst mér ekki hægt að tala um sérstaklega grófan leik af okkar hálfu."