FH-ingar feti frá titlinum

FH-ingar stigu í gærkvöldi stórt skref í átt að fyrsta Íslandsmeistaratitli félagsins í knattspyrnu í meistaraflokki karla með því að leggja Grindvíkinga að velli, 0-4, á útivelli. Fimleikafélag Hafnarfjarðar hefur nú 3ja stiga forskot á Eyjamenn þegar aðeins tvær umferðir eru eftir af Landsbankadeildinni og það er ekki margt sem bendir til þess að FH-ingar komi til með að misstíga sig. Liðið er að leika hreint út sagt frábæra knattspyrnu og sjálfstraustið skín af því og allir sem að liðinu koma trúa því að árangur náist. Á löngum köflum í gærkvöldi yfirspiluðu FH-ingar andstæðinga sína og boltinn gekk hratt og örugglega á milli manna og þeir áttu í engum vandræðum með að opna svæði upp á gátt. Það var síðan ekki til að bæta úr skák fyrir heimamenn að Grétar Ólafur Hjartarson fór meiddur af velli sex mínútum eftir annað mark FH-inga. Sinisa Kekic var ekki með Grindvíkingum að þessu sinni og því var í raun engin spurning um hvort liðið myndi ná sigri eftir annað mark gestanna - frekar það hversu mörg mörk FH-ingar myndu skora. Lið FH er eins og vel smurð vél sem gengur hnökralaust. Eftir hinn glæsilega sigur í Skotlandi í síðustu viku var alveg ljóst að þetta lið er tilbúið - tilbúið í titla - tilbúið í hvað sem er. Breidd þess er án efa sú mesta á landinu en það er á engan hallað þótt sérstaklega sé minnst á þátt Heimis Guðjónssonar, fyrirliða. Heimir var að vonum kátur eftir leik en þó jarðbundinn: "Við lékum mjög vel í þessum leik og liðsheildin var eins og best verður á kosið. Við vorum afar einbeittir alveg frá byrjun og menn voru meira en staðráðnir að ná sigri hér og gerðum það með stæl - spiluðum góðan fótbolta og unnum þetta sannfærandi. Stór partur af góðum árangri okkar er sá að menn eru að hafa virkilega gaman af þessu og það smitar út frá sér. Þá segi ég það enn og aftur að það er ekkert nema gott að spila svona marga leiki eins og við erum búnir að gera í sumar. Fleiri leikir þurfa ekkert endilega að þýða meira álag, það er miklu betra að spila meira og æfa minna og miklu skemmtilegra," sagði Heimir Guðjónsson. Óli Stefán Flóventsson, hinn fjölhæfi leikmaður Grindvíkinga, var að vonum svekktur með frammistöðu síns liðs eftir leik: "FH-ingar voru einfaldlega mun betri en við í þessum leik og óhætt að segja að þeir hafi sýnt sannkallaða meistaratakta - ef þeir halda svona áfram er engin spurning hvert titlarnir í ár fara. Við verðum hins vegar að gjöra svo vel að hysja upp um okkur buxurnar og halda áfram ótrauðir. Við höfum staðið í svona fallbaráttu áður - vitum alveg um hvað þetta snýst - og höfum fulla trú á því að við getum rétt úr kútnum í þeim tveimur leikjum sem eftir eru," sagði Óli Stefán.