Leiðin til að koma á heimsfriði

"Við horfðum á Ólympíuleikana og fórum á Akrópólisarhæð og var sagt frá grísku goðsögunum," segir Esther Viktoría Ragnarsdóttir en hún vann miða til Aþenu á Ólympíuleikum ímyndunaraflsins teiknisamkeppni Visa. "Okkur var skipt í hópa og ég var með krökkum frá Evrópu," en í Evrópuhópnum voru krakkar frá ítalíu, Grikklandi, Noregi, Tyrklandi og Englandi. Esther bauð mömmu sinni, Önnu Þóru Jónsdóttur með til Aþenu. "Esther eignaðist mjög góða vini sem hún er búin að vera í msn og tölvupóstssambandi við síðan hún kom heim," segir Anna Þóra. "Það var einn í Aþenu sem sagði að það að fylgjast með krökkunum væri eins og að sjá litla útgáfu af Sameinuðu þjóðunum. Við sannfærðumst um að þetta er leiðin til að koma á friði í heiminum, að brúa bilið milli fólks með því að láta krakka úr öllum heimshornum hittast." Sýning stendur yfir á verkum myndlistarkrakkanna í Aþenu. "Ég teiknaði jörðina og inn í jörðina auga og inn í augað ólíkar íþróttagreinar," segir Esther Viktoría sem vill með auganu biðja heiminn að sjá að það er hægt að lifa í vináttu og sátt. Einn af krökkunum var svo valinn til að fara á Vetrarólympíuleikana árið 2006. "Við héldum með rússneskum strák, Maxim Mokronosov, sem er ellefu ára en leit út fyrir að vera mun yngri," segir Anna. "Hann hafði misst báða foreldra sína í slysi og ólst upp á munaðarleysingjahæli í Rússlandi þar sem hann er enn. Ferðin til Aþenu hefur án efa verið stærsti viðburðurinn í hans lífi hingað til og okkur langaði svo að hann kæmist líka til Torino á Ítalíu." Svo fór að lokum að kínversk stelpa hlaut verðlaunin sem Albert prins og nokkrir heimsfrægir íþróttamenn afhentu og íslensku mæðgurnar eru sammála um að Aþenuferðin hafi verið ógleymanleg. "Visa á sannarlega hrós skilið fyrir að gera öllum þessum börnum kleift að upplifa þennan draum," segir Anna en hægt er að skoða verkin, þar á meðal gullfallega mynd hins rússneska Maxims, á heimasíðunni visa.com/visakids.