FH mætir KA í bikarnum

Dregið var í undanúrslitum bikarkeppninnar í knattspyrnu í hádeginu í dag. Hjá körlunum drógust saman annarsvegar FH og KA og hins vegar HK og Keflavík. Leikirnir verða báðir á Laugardalsvelli. Leikur FH og KA fer fram 25. september en HK og Keflavík mætast daginn eftir. Báðir hefjast leikirnir klukkan 14. Af þessum fjórum liðum hefur aðeins Keflavík náð að hampa bikarnum, árin 1975 og 1997. Úrslitaleikurinn fer fram 2. október. Fréttablaðið var á svæðinu og spjallaði við fulltrúa liðanna að afloknum drættinum. Heimir Guðjónsson, fyrirliði FH-inga, var sáttur og hafði þetta að segja: "Ég er bara nokkuð sáttur. KA er verðugur andstæðingur, þeir eru með sterkt lið og vel skipulagt. Við gerðum jafntefli við þá í deildinni en stefnum á að gera betur og komast aftur í bikarúrslitaleikinn. Reyndar eigum við harma að hefna gegn KA í bikarnum því við töpuðum illa fyrir þeim á heimavelli í undanúrslitunum árið 2001 en þá voru þeir í 1. deild og sá leikur var enn eitt dæmið um hvað gerst getur í bikarkeppninni. Við vorum nálægt bikarnum í fyrra og það er engin spurning að stefnan er sett á dolluna. Eins og oft hefur komið fram hefur FH aldrei hampað stórum titli en það er á dagskrá að breyta sögunni í sumar," sagði Heimir. Það verður án efa erfitt að mæta FH en við erum hvergi bangnir þrátt fyrir að okkur hafi ekki gengið alltof vel í deildinni upp á síðkastið," sagði Atli Sveinn Þórarinsson, leikmaður KA, og hélt áfram: "Ég vona bara að þetta verði skemmtilegur leikur og á reyndar von á því. Við mætum FH tvisvar með stuttu millibili, spilum við þá í síðustu umferð deildakeppninnar og síðan strax eftir það í bikarnum og því má eiga von á smá sálfræðistríði og það verður bara spennandi. FH-ingar spila skemmtilegan fótbolta og það er gaman að kljást við þá. Við stefnum að sjálfsögðu í bikarúrslitin, en númer eitt, tvö og þrjú hjá okkur er þó að halda sæti okkar í deildinni," sagði Atli Sveinn. 1. deildarlið HK hefur komið skemmtilega á óvart í bikarkeppninni það sem af er og þeir slógu meðal annars út bikarmeistara ÍA í 32-liða úrslitum. Gunnleifur Gunnleifsson, markvörður og fyrirliði HK, var brattur eftir dráttinn: "Þetta er bara búið að vera ævintýri og vonandi heldur það áfram hjá okkur. Fyrst við erum komnir þetta langt þýðir ekkert að fara að stoppa núna. Við getum lagt hvaða lið að velli sem er enda höfum við mikla trú á því sem við erum að gera. Eins og staðan er í dag eru markmið liðsins tvö; að komast í bikarúrslitaleikinn og að komast upp um deild. Maður væri ekkert að standa í þessu ef stefnan væri ekki sett hátt, þá væri ekkert gaman að þessu," sagði Gunnleifur. Milan Stefán Jankovic, þjálfari Keflvíkinga, og var á því að það væri ekkert endilega betra að fá 1. deildarlið HK fremur en eitthvað úrvalsdeildarlið. "Þetta snýst allt um að halda einbeitningunni í lagi og halda síðan vanmatinu frá. Það getur verið hættulegt að vera fyrirfram talinn sterkari aðilinn og við verðum að passa okkur á því. HK hefur sýnt það með frammistöðu sinni að liðið á vel skilið að vera komið í undanúrslitin, þeir eru ferskir og baráttuglaðir og hafa greinilega gaman af þessu. Við verðum því að koma vel stemmdir til leiks enda er þetta er mjög mikilvægur leikur. Það eru sjö ár síðan Keflavík vann bikarinn og alveg kominn tími á að ná honum aftur," sagði Milan Stefán Jankovic.