Freyr fyrir valinu

Fréttablaðið hefur valið FH-inginn, Frey Bjarnason, besta leikmann 7-12 umferðar Landsbankadeildar karla í knattspyrnu. FH trónir á toppi deildarinnar og er það að auki komið í undanúrslit bikarkeppninnar og hefur að margra mati leikið skemmtilegasta boltann. Freyr hefur vart stigið feilspor í FH-vörninni í sumar en þessi 27 ára gamli Skagamaður kom til liðsins fyrir fjórum árum síðan. "Ég er fæddur og uppalinn á Akranesi og lék með ÍA upp alla yngri flokkana en hafði ekki náð að festa mig í sessi í meistaraflokki þegar ég flutti í bæinn og fór í FH." Aðspurður segir Freyr að hann hafi ekki farið að spila í vörninni að neinu ráði fyrr en hann kom til FH. "Ég var oftast á miðjunni en fann mig strax vel í varnarleiknum hjá FH og hef verið þar síðan," segir Freyr, sem er með B.A. gráðu í félagsfræði og ensku og hefur undanfarin ár starfað sem blaðamaður. Hann lætur vel af dvölinni hjá FH, er hann ekki einfaldlega farinn að líta á sig sem ekta FH-ing? "Eiginlega er ég farinn að gera það," segir Freyr brosandi og bætir við: "Ég hef nánast spilað allan minn feril í meistaraflokki með FH og þetta er mitt félag." Staða FH í dag er mjög góð en þetta fornfræga félag hefur hins vegar aldrei náð að hampa stórum titli í knattspyrnu. Í fyrra var liðið í öðru sæti, bæði í deild og bikar. Telur Freyr að nú sé tími FH kominn og að liðið nái að yfirstíga stóru hindrunina? "Hvers vegna ekki, það er allt til alls hjá okkur og auðvitað stefnum við ótrauðir á að brjóta ísinn. Hins vegar erum við alveg á jörðinni og vitum sem er að ef við höldum ekki einbeitingunni getur farið illa. Á hinn bóginn er mjög góð umgjörð í kringum félagið og góðir menn sem standa á bak við hana. Þá eru stuðningsmennirnir einstakir og allt þetta hefur gert það að verkum að frábær stemning ríkir í Kaplakrika og hún hefur svo sannarlega skilað sér inn í liðið. Það er valinn maður í hverju rúmi hjá okkur og menn eru virkilega að hafa gaman af því sem þeir eru að gera," sagði Freyr Bjarnason.