Íslandsmótið í höggleik hafið

Helena Árnadóttir, tvítug stúlka frá Akureyri, sló öllum bestu kvenkylfingum Íslands við á fyrsta degi Íslandsmótsins í höggleik á Garðavelli á Akranesi í gær. Helena, sem hefur ekki tekið þátt í Toyota-mótaröðinni á þessu tímabili vegna meiðsla, vann meistaramót Golfklúbbs Akureyrar með miklum yfirburðum um síðustu helgi og hélt uppteknum hætti á fyrsta degi Íslandsmótsins. Hún lék holurnar átján á 71 höggi eða einu höggi undir pari og hefur fimm högga forystu á næstu konur sem eru Tinna Jóhannsdóttir og Ólöf María Jónsdóttir úr Golfklúbbnum Keili og Herborg Arnardóttir Golfklúbbi Reykjavíkur. Íslandsmeistarinn frá því í fyrra, Ragnhildur Sigurðardóttir úr Golfklúbbi Reykjavíkur er síðan einu höggi á eftir þeim þremur ásamt Nínu Björk Geirsdóttur úr Golfklúbbnum Kili og Þórdísi Geirsdóttur úr Golfklúbbnum Keili. Helena sagði í samtali við Fréttablaðið í gær að hún hefði náð draumahring. "Það má eiginlega segja að allt hafi gengið upp í dag. Völlurinn var frábær, flatirnar æðislegar og ég spilaði mjög stöðugt allan tímann,"sagði Helena sem er, eins og fram kemur hér að ofan, nýstigin upp úr meiðslum. Hún sagðist ekki vera farin að hugsa mikið um sigur á mótinu enda væri það fullsnemmt en viðurkenndi þó að þessi árangur væri vonum framar og gefur henni byr undir báða vængi í framhaldinu. "Ég ætla að halda rónni. Auðvitað er pressa á mér en það er aðallega pressa sem ég set á sjálfa mig. Það eru þrír hringir eftir og því miður hefur enginn verið krýndur sem sigurvegari eftir fyrsta hring," sagði Helena. Birgir Leifur Hafþórsson úr Golfklúbbi Kópavogs og Garðabæjar, sem bar sigur úr býtum á Íslandsmótinu í höggleik í Vestmannaeyjum í fyrra, hefur forystu í karlaflokki eftir fyrsta dag. Hann lék holurnar átján á 68 höggum eða fjórum höggum undir pari, einu höggi minna en Örn Ævar Hjartarson úr Golfklúbbi Suðurnesja. Ólafur Már Sigurðsson úr Golfklúbbnum Keili og Rúnar Óli Einarsson úr Golfklúbbi Suðurnesja eru þremur höggum á eftir Birgi Leif.