Fréttir

Upplýsingagjöf ólögleg

Evrópusambandið braut gegn lögum þegar það samþykkti að skylda evrópsk flugfélög til að láta Bandaríkjamönnum í té upplýsingar um flugfarþega þeirra. Þetta er niðurstaða Evrópudómstólsins.

Erlent 30.5.2006 09:18

Innbrotsþjófar gleymdu myndavélinni

Lögreglan á Selfossi leitar nú nokkurra innbrotsþjófa sem brutust inn í sumarbústað i Grímsnesi um helgina og virðast hafa slegið upp teiti á staðnum. Góður gleðskapur er gjarnan festur á filmu og gerður þjófarnir enga undantekningu á því. Það varð þeim hinsvegar að falli, því þeir gleymdu myndavélinni á vettvangi og telur lögreglan sig þegar þekkja einn þeirra af myndum úr teitinu, og ætlar að hafa tal af honum í dag.

Innlent 30.5.2006 07:11

Þrír fórust í átökum á Gazasvæðinu

Þrír biðu bana og fjórir særðust í átökum Ísraelshers og palestínskra vígamanna á Gaza-ströndinni í morgun, að sögn heimildarmanns úr röðum Palestínumanna.

Erlent 30.5.2006 07:09

Sjálfstæðismenn og frjálslyndir mynda meirihluta á Akranesi

Sjálfstæðisflokkur og Frjálslyndir og óháðir mynduðu meirihluta í bæjarstjórn á fundi í gærkvöldi. Fréttavefurinn Skessuhorn punktur is greinir frá því að samkvæmt áreiðanlegum heimildum þá verði Gísli S. Einarsson fyrrverandi þingmaður Samfylkingarinnar næsti bæjarstjóri.

Innlent 30.5.2006 08:24

Reyndi að stinga lögregluna af

Ungur ökumaður bifhjóls, sem reyndi að stinga lögregluna af í Reykjavík í gærkvöldi, slapp ómeiddur þótt hann hafi tvisvar fallið af hjólinu á flóttanum. Þegar lögreglumenn reyndu að hafa tal af honum í miðborginni gaf hann í austur Sæbraut, þar sem hann féll á gatnamótunum við Snorrabraut.

Innlent 30.5.2006 07:03

Sumarþing hefst í dag

Sumarþing hefst í dag en þingmenn tóku sér frí í byrjun mánaðarins vegna nýliðinna sveitarstjórnarkosninga. Nefndarfundir hófust í gær og halda áfram í fyrramálið. Fjöldi mála liggur fyrir þinginu og um flest þeirra er væntanlega sátt á milli stjórnarliða og stjórnarandstæðinga. Um nokkur mál standa þó deilur og þingfundur hefst á því að ræða eitt þeirra, nýtt frumvarp menntamálaráðherra um Ríkisútvarpið.

Innlent 30.5.2006 07:52

Fjórir fórust í sprengingu í efnaverksmiðju

Að minnsta kosti fjórir létu lífið og þrír slösuðust í sprengingu í efnaverksmiðju um þrjátíu kílómetra suðvestur af Belgrad, höfuðborg Serbíu, í gær. Auk þess að framleiða ýmis eiturefni er sprengiefni framleitt í verksmiðjunni en sprengingin mun hafa orðið þar sem sú framleiðsla fer fram.

Erlent 30.5.2006 07:01

Ökumaður slapp með skrekkinn

Þau undur gerðust í Njarðvík í gærkvöldi að vél í nýlegum jepplingi hreinlega sprakk í miðjum akstri, og eldur kviknaði í vélarhúsinu. Vegfarandi gat haldið eldinum í skefjum þar til slökkviliðið kom á vettvang og slökkti hann. Kom þá í ljós að sjálf blokkin í vélinni var sprunginn og ýmislegt innvols úr vélinni lá í götunni auk þess sem olía og kælilvökvi láku úr vélinnin þannig að slökkviliðsmenn þurftu að hreinsa vettvanginn. Ökumaðurinn slapp ómeiddur en orsakir þessa eru ókunnar.

Innlent 30.5.2006 07:00

Grískum ráðherra sýnt banatilræði

Öflug sprengja sprakk við heimili ráðherra menningarmála í Grikklandi í Aþenu í morgun. Enginn særðist í sprengingunni, að sögn lögreglu, en nokkrir bílar eyðilögðust. Ekki fylgir sögunni hvort bíll ráðherrans, George Voulgarakis, hafi verið þar á meðal en sprengjan sprakk skömmu áður en ráðherrann lagði af stað til vinnu.

Erlent 30.5.2006 06:55

Meirihlutaviðræður halda áfram í dag

Fulltrúar Fjarðarlistans og Framsóknarflokksins í Fjarðabyggð hafa ákveðið að halda meirihlutasamstarfi sínu áfram, en nú stækkar sveitarfélagið um Austurbyggð, Mjóafjarðarhrepp og Fáskrúðsfjörð.

Innlent 30.5.2006 06:53

Útgöngubann í Kabúl

Útgöngubann hefur verið sett á í Kabúl, höfuðborg Afganistans, vegna átakanna sem þar hafa geisað síðasta sólarhring. Átökin hófust eftir að bandarískur herbíll keyrði á fjölda farartækja á götum borgarinnar og varð fimm manns að bana.

Erlent 30.5.2006 06:50

Vinstri grænir í Kópavogi harma ákvörðun Framsóknarmanna

Vinstri græn í Kópavogi hafa sent frá sér yfirlýsingu þar sem þeir harma þá ákvörðun Framsóknarmanna í Kópavogi að ganga til samstarfs við Sjálfstæðisflokkinn um áframhaldandi meirihlutasamstarf í bæjarstjónr Kópavogs. Segja Vinstri grænir framsóknarflokkinn þar með kasta frá sér sögulegu tækifæri til að losna úr viðjum þess meirihluta sem er á góðri leið með að þurrka Framsóknarflokkinn út, ekki bara í Kópavogi heldur víðast hvar á landinu.

Innlent 29.5.2006 22:01

Landsvirkjun opnar tilboð í IP Telephone Exchange

Í dag opnaði Landsvirkjun tilboð í IP Telephone Exchange. Alls bárust níu tilboð og var það hæsta frá EJS og hljóðaði það upp á rúmar 12 komma 8 milljónir króna. Notrek ehf. átti næsthæsta tilboðið og Sensa það þriðja hæsta.

Innlent 29.5.2006 21:54

Róstur gegn útlendingum í Kabúl

Að minnsta kosti átta manns hafa látið lífið í uppþotum í Kabúl, höfuðborg Afganistans, sem beinast gegn útlendingum í borginni. Tíu Íslendingar eru í Kabúl en ekkert amar að þeim, að sögn utanríkisráðuneytisins.

Erlent 29.5.2006 20:02

Eyþór tekur ekki sæti í bæjarstjórn Árborgar strax

Eyþór Arnalds missir ökuréttindi í tólf mánuði og greiðir 150 þúsund króna sekt, samkvæmt lögreglusátt sem hann gekk frá á föstudaginn. Hann tekur ekki sæti sitt í bæjarstjórninni í Árborg fyrr en árið er liðið. Sem kunnugt er ók Eyþór ölvaður á ljósastaur við Kleppsveg fyrir rúmlega hálfum mánuði. Hann hefur þegar skilað inn ökuskírteininu og greitt sektina.

Innlent 29.5.2006 19:40

Bilun í stjórnbúnaði ljósabekks olli bruna

Nú er ljóst að eldurinn sem kom upp í Akureyrinni úti fyrir Látrabjargi á laugardag kviknaði vegna bilunar í stjórnbúnaði ljósabekks sem staðsettur var í frístundarými skipsins.

Innlent 29.5.2006 16:51

Meirihlutaviðræðum á Akureyri slitið

Samfylkingin á Akureyri hefur slitið meirihlutaviðræðum við L-lista og Vinstri hreyfinguna - grænt framboð í bæjarstjórn Akureyrar. Frá þessu er greint í tilkynningu frá Samfylkingunni.

Innlent 29.5.2006 17:14

Vilhjálmur borgarstjóri og Björn Ingi formaður borgarráðs

Vilhjálmur Þ. Vilhjálmsson er ný borgarstjóri Reykjavíkur og Björn Ingi Hrafnsson nýr formaður borgarráðs samkvæmt samkomulagi sem Framsóknaflokkurinn og Sjálfstæðisflokkurinn gerðu í Reykjavík um meirihlutasamstarf. Þetta var tilkynnt fyrir stundu eftir fund framsóknarmanna og sjálfstæðismanna á heimili Vilhjálms í Breiðholti.

Innlent 29.5.2006 17:05

Laun forstjóra Tesco hækka um 25 prósent

Laun Terry Leahys, forstjóra bresku verslunarkeðjunnar Tesco, hafa hækkað um 25 prósent á milli ára. Árslaun forstjórans nema nú fjórum milljónum punda, jafnvirði rúmlega 524 milljóna íslenskra króna. Innifalin í launum hans eru hlunnindagreiðslur upp á 2,8 milljón pund, jafnvirði tæpra 380 milljóna íslenskra króna.

Viðskipti erlent 29.5.2006 16:50

Bein útsending frá blaðamannafundi um myndun meirihluta í borginni á NFS og Vísi kl. 17

Bein útsending verður frá blaðamannafundi um myndun nýs meirihluta í borgarstjórn Reykjavíkur á NFS og hér á Vísi klukkan 17. Fundurinn fer fram við heimili Vilhjálms Þ. Vilhjálmssonar, oddvita D-lista, í Breiðholti. Samkvæmt heimildum NFS hafa sjálfstæðismenn og framsóknarmenn náð samkomulagi um myndun meirihluta í borgarstjórn.

Innlent 29.5.2006 16:20

Einn blóðugasti dagurinn í Bagdad frá upphafi stríðsins

Senn er að kveldi kominn einn blóðugasti dagurinn í Bagdad í Írak frá upphafi stríðs í landinu fyrir rúmum þremur árum. Minnst þrjátíu og þrír hafa fallið og fjölmargir særst í röð sprenginga.

Erlent 29.5.2006 16:10

Sjálfstæðisflokkur og Framsóknarmenn að mynda nýjan meirihluta

Sjálfstæðismenn og Framsóknarmenn eru að ná samkomulagi um myndun nýs meirihluta í Reykjavíkurborg skv. heimildum NFS. Tilkynning um málið verður send út innan tveggja klukkustunda samkvæmt sömu heimild. Bein útsending verður frá blaðamannafundi um myndun meirihlutans á NFS kl. 17.

Innlent 29.5.2006 16:01

Dómkirkja brennur í Finnlandi

Dómkirkjan í Porvoo í Suður-Finnlandi, ein elsta kirkja landsins, skemmdist töluvert í bruna í nótt. Ekki er vitað um eldsupptök en samkvæmt upplýsingum yfirvalda kviknaði eldurinn utan við kirkjuna og grunur leikur á að um íkveikju sé að ræða.

Erlent 29.5.2006 15:50

Ekkert amar að Íslendingunum í Kabúl

Ekkert amar að tíu Íslendingum sem eru að störfum í Kabúl, samkvæmt upplýsingum frá utanríkisráðuneytinu, en minnst átta manns hafa fallið og rúmlega hundrað slasast í átökum í borginni í dag.

Innlent 29.5.2006 15:16

Skrifað undir viljayfirlýsingu um meirihlutamyndun

Sjálfstæðismenn og framsóknarmenn á Ísafirði skrifuðu undir viljayfirlýsingu um myndun meirihluta á Ísafirði fyrir stundu. Samkvæmt yfirlýsingunni verður Halldór Halldórsson, oddviti Sjálfstæðisflokksins, áfram bæjarstjóri.

Innlent 29.5.2006 15:41

Framsóknarflokkurinn lagður í einelti

Sjálfstæðismenn og Framsóknarmenn hafa náð samkomulagi um áframhaldandi samstarf í bæjarstjórn Kópavogs. Oddviti Framsóknarflokksins segir flokkinn hafa orðið fyrir einelti en hann segir forystu flokksins bera ákveðna ábyrgð á slöku gengi og býður spenntur eftir að sjá hvernig hún ætlar að axla þá ábyrgð.

Innlent 29.5.2006 14:35

Vilhjálmur slítur meirihlutaviðræðum við Frjálslynda

Vilhjálmur Þ. Vilhjálmsson oddviti Sjálfstæðisflokksins í borgarstjórn Reykjavíkur sleit í dag viðræðum við Ólaf F. Magnússon fulltrúa Frjálslynda flokksins. Hann tilkynnti Ólafi síðdegis að afstaða Frjálslyndra í flugvallarmálinu væri of stíf til að viðræður gætu borið árangur.

Innlent 29.5.2006 14:09

Hlutfall kvenna í sveitastjórnum hækkar um 4%

Hlutfall kvenna á framboðslistum og í sveitastjórnum landsins fer hækkandi. Hlutfall kvenna í sveitastjórnum hefur aukist um tæp fjögur prósent frá síðustu sveitastjórnarkosningum.

Innlent 29.5.2006 13:21

Gunnar I. Birgisson segir af sér þingmennsku

Gunnar I. Birgisson, bæjarstjóri í Kópavogi og þingmaður Sjálfstæðisflokks, ætlar að segja af sér þingmennsku. Þetta sagði hann í hádegisviðtalinu á NFS í dag.

Innlent 29.5.2006 13:36

Eldvirkni í Merapi meiri eftir jarðskjálftann

Yfirmaður hjálparstarfs hjá Sameinuðu þjóðunum segir björgunarsveitir og lækna í kapphlaupi við tímann að bjarga þeim sem slösuðust í jarðskjálfta sem skall á indónesísku eyjunni Jövu um helgina og varð minnst 5.000 manns að bana. Eldvirkni í eldfjallinu Merapi á Jövu hefur aukist.

Erlent 29.5.2006 12:19