WOW semur við flugfreyjur

WOW air og Flugfreyjufélag Íslands undirrituðu i í dag kjarasamning sín á milli en aðalfundur félagsins er í dag. Í tilkynningu frá WOW segir að um sé að ræða heildarsamning sem taki á öllu sem við starfinu kemur og gildir hann til 31. janúar 2014.

SA segir að fjölga þurfi nemendum í raungreinum

Fjölga þarf útskrifuðu fólki úr verkfræði, tækni- og raunvísindanámi á Íslandi. Nú þegar er gífurleg eftirspurn fyrirtækja eftir starfsfólki sem hefur aflað sér raungreina- og tæknimenntunar á háskólastigi.

Verulega dró úr útlánum ÍLS milli ára í mars

Verulega dró úr útlánum Íbúðalánasjóðs (ÍLS) milli ára í mars s.l. Heildarútlán Íbúðalánasjóðs námu rúmum 1,4 milljörðum króna í mánuðinum en þar af voru tæpar 960 milljónir króna vegna almennra lána. Til samanburðar námu almenn útlán í mars í fyrra rúmum 1,7 milljörðum króna.

Samherji fær gögn frá gjaldeyriseftirlitinu

Gjaldeyriseftirlit Seðlabanka Íslands hefur afhent Samherja þau gögn sem lágu til grundvallar þegar Héraðsdómur úrskurðaði um heimild til húsleitar og haldlagningar gagna hjá Samherja og tengdum félögum þann 27. mars síðastliðinn.

Glitnir lánaði Björgólfi 2.7 milljarða

Glitnir lánaði Björgólfi Guðmundssyni 2,7 milljarða króna án nokkurra veða, að því er fram kemur í stefnu slitastjórnarinnar gegn endurskoðunarfyrirtækinu PWC. Slitastjórnin telur PWC algjörlega hafa brugðist í hlutverki sínu sem endurskoðandi bankans fyrir hrun.

Tæplega fimm milljarða skuldir afskrifaðar hjá móðurfélagi Odda

Tæplega fimm milljarða króna skuldir móðurfélags Odda, eignarhaldsfélagsins Kvosar, hafa verið afskrifaðar að því er greint er frá í DV í dag. Þorgeir Baldursson, fyrrverandi stjórnarmaður Landsbankans sem oft er kenndur við prentsmiðjuna Odda, var skráður stærsti eigandi Kvosar með ríflega fjórðungshlut, áður en kom að fjárhagslegri endurskipulagningu félagsins.

Dauft yfir fasteignamarkaðinum í páskavikunni

Frekar dauft var yfir fasteignamarkaðinum á höfuðborgarsvæðinu í páskavikunni í síðustu viku eins og nær ávallt er.

Kortavelta landsmanna heldur áfram að aukast

Kortavelta landsmanna heldur áfram að aukast milli ára. Heildarvelta debetkorta í mars síðastliðnum var 30,7 milljarðar króna sem er 9,2% aukning miðað við mars í fyrra.

Aukinn þorskkvóti þýðir 400 milljónir í gjaldeyristekjur á mánuði

Verði þorskkvótinn stækkaður um 10% á næsta fiskveiðiári, eins og flest bendir til, gæti sú aukning skilað þjóðarbúinu tæplega hálfu prósenti í auknum hagvexti.

Hagnaður endurskoðenda hefur dregst lítillega saman

Hagnaður þriggja af fjórum stærstu endurskoðunarfyrirtækjum landsins dróst saman í fyrra. Alls þénuðu fyrirtækin þrjú, KPMG, PWC og Ernst&Young, 161,7 milljónum krónum minna á síðasta rekstrarári en árið á undan. Þetta kemur fram í nýjustu ársreikningum þeirra.

AGS kallar eftir aðhaldssamari hagstjórn

Alþjóðagjaldeyrissjóðurinn hvetur til þess að stjórnvöld sýni meira aðhald í ríkisfjármálum og telur réttast að Seðlabankinn hækki stýrivexti vegna aukins verðbólguþrýstings. Þá telur sjóðurinn að gengi krónunnar gæti enn veikst nokkuð á næstunni. Þetta er meðal þess sem kemur fram í skýrslu AGS um íslenskt efnahagslíf sem kom út í síðustu viku en stofnunin gefur reglulega út slíkar skýrslur.

Ríkið að selja Bjálmholt í Rangárþingi ytra

Frestur til þess að skila inn tilboðum í jörðina Bjálmholt í Rangárþingi ytra rennur út klukkan 10:00 17. apríl nk., en Ríkiskaup, fyrir hönd íslenska ríkisins, óskuðu eftir tilboðum í jörðina með auglýsingu í gær.

Samskip fjárfestir fyrir 4 milljarða

Samskip hafa fest kaup á gámaflutningaskipunum Arnarfelli og Helgafelli sem verið hafa í siglingum fyrir félagið milli Íslands og Evrópuhafna frá ársbyrjun 2005. Um er að ræða nærri fjögurra milljarða króna fjárfestingu fyrir Samskip. Samskip hafa verið með Arnarfell og Helgafell á leigu frá því að þau voru smíðuð fyrir sjö árum. Íslenskar áhafnir eru á báðum skipunum.

Ernir flýgur beint til Húsavíkur

Flugfélagið Ernir hefur beint áætlunarflug til Húsavíkur klukkan þrjú í dag og er áætluð lending á Húsavík korter í fjögur. Þetta er fyrsta áætlunarflug frá Reykjavík til Húsavíkur í 12 ár og eru viðtökur heimamanna við fluginu frábærar.

Fjölgun ferðamanna með ólíkindum

Ferðaþjónusta hefur aukist gríðarlega í vetur og fjölgun ferðamanna er með ólíkindum, segir Erna Hauksdóttir, framkvæmdastjóri Samtaka ferðaþjónustunnar. Hún segir að stærsta verkefnið sé eftir se áður að fjölga ferðamönnum utan háannatímans og fá betri nýtingu á alla þá fjárfestingu sem hefur verið ráðist í í tengslum við ferðaþjónustuna. Máli sínu til stuðnings bendir Erna á að 26% aukning hefði orðið á komu ferðamanna í mars.

HB Grandi greiðir tæpar 700 milljónir í arð

HB Grandi greiðir hluthöfum samtals um 679 milljónir króna í arð vegna siðasta árs eða um 0,40 krónur á hvern hlut. Tillaga þessa efnis var samþykkt á hluthafafundi HB Granda í gær. Þá var jafnframt samþykkt að stjórnarmenn fengu 800 þúsund krónur í laun fyrir störf sín fyrir fyrirtækið á árinu og formaður stjórnarinnar fengi 2,4 milljónir.

Óttast að upptökur leki á netið

Hæstiréttur hefur staðfest úrskurð Héraðsdóms Reykjavíkur þess efnis að verjendur Lárusar Welding og Guðmundar Hjaltasonar, fyrrverandi yfirmanna hjá Glitni, eigi ekki rétt að fá í hendur geisladiska með upptökum af yfirheyrslum skjólstæðinga sinna.

Ríkið fær 1,8 milljarða í arð frá Landsvirkjun

Rekstrarhagnaður Landsvirkjunar jókst talsvert árið 2011. Fjármálastjóri fyrirtækisins segir skuldastöðu þess viðráðanlega með þeim fyrirvara þó að lokist erlendir fjármagnsmarkaðir gæti hið opinbera þurft að styrkja eigið fé félagsins.

Dómurinn ógnar ekki stöðugleika

Fjármálaeftirlitið (FME) telur að áhrif gengislánadóms Hæstaréttar frá 15. febrúar síðastliðnum og endurreikningar lána vegna hans ógni ekki fjármálastöðugleika.

Unnið með skrímslum og legógeimskipum hjá CCP

Höfustöðvar tölvuleikjaframleiðands CCP eru ævintýralegur vinnustaður þar sem skrímsli, tæknilegó, fiskar, rafmagnstrommusett og spilakassar, svo eitthvað sé nefnt, setja mark sitt á vinnuumhverfið.

Tefjar fengu útflutningsverðlaun forseta Íslands

Það var fyrirtækið Trefjar ehf. sem hlaut útflutningsverðlaun forseta Íslands í gær. Frá árinu 1979 hefur fyrirtækið framleitt yfir 400 smábáta af ýmsum stærðum og gerðum.

Ætla að framleiða Senegal lúru á Reykjanesi

Gengið hefur verið frá byggingarleyfi fyrir nýja fiskeldisstöð sem byggð verður í landi Reykjanesbæjar á Reykjanesi.

4G þjónustan væntanleg á Ísland

Póst- og fjarskiptastofnun mun úthluta tíðnum fyrir 4G þjónustu hér á landi síðar á þessu ári. Það verður gert með uppboði og verður 800 MHz og 1800 MHz tíðnisviðunum úthlutað fyrst.

Stjórn AGS lýkur reglubundnu eftirliti

Stjórn Alþjóðagjaldeyrissjóðsins (AGS) hefur lokið reglubundinni úttekt á íslensku efnahagslífi samkvæmt reglugerð fjögur og birti skýrslu þess efnis í gær samkvæmt tilkynningu frá efnahags- og viðskiptaráðuneytinu.

Krónan um 5 til 20 prósentum undir jafnvægisraungengi

Alþjóðagjaldeyrissjóðurinn telur að krónan sé nú um 5-20% undir jafnvægisraungengi. Þetta merkir að litið til lengri tíma gæti raungengi krónunnar hækkað, þar sem hún er vanmetin, og þá annað hvort eða hvorutveggja með því að nafngengi krónu hækkar og/eða að verðbólgan og launahækkanir verði meiri en í helstu viðskiptalöndunum. Þetta kemur fram í morgunkorni Íslandsbanka.

Skuldsett heimili dýpka og lengja kreppur

Kreppur verða langvinnari og dýpri eftir því sem heimili eru skuldsettari í aðdraganda þeirra. Þetta er meðal þess sem fram kemur í nýrri skýrslu Alþjóðagjaldeyrissjóðsins (AGS) um skuldir heimila. Bornar eru saman skuldakreppur og fall eignaverðs víða um lönd á ólíkum tímum.

MS ræðst í milljarða fjárfestingu

Mjólkursamsalan, MS, sem er afurðafyrirtæki í eigu íslenskra kúabænda, ræðst á næstu mánuðum í 1,5 til tveggja milljarða króna fjárfestingar og breytingar á skipulagi í stærstu afurðastöðvum sínum. Þetta kemur fram í tilkynningu fyrir MS.

Heildarafli íslenskra skipa talsvert meiri

Heildarafli íslenskra skipa í nýliðnum marsmánuði, metinn á föstu verði, var 21,2% meiri en í mars 2011. Það sem af er árinu hefur aflinn aukist um 29,3% miðað við sama tímabil 2011, sé hann metinn á föstu verði. Þetta kemur fram á vef Hagstofunnar.

Glacier Securities ráðgjafi í stóru jarðhitaverkefni í Bandaríkjunum

Dótturfyrirtæki Íslandsbanka, Glacier Securities, sem sérhæfir sig í verkefnum á sviði jarðvarma í Bandaríkjunum, er ráðgefandi aðili í umfangsmiklu jarðvarmaverkefni í Nevada í Bandaríkjunum en viljayfirlýsing vegna þess var undirrituð í gær samkvæmt upplýsingum frá Íslandsbanka.

Stór eldisstöð fyrir flatfisk í burðaliðnum á Suðurnesjum

Hafnar eru framkvæmdir við gerð eldisstöðvar fyrir flatfisk, í grennd við orkuver HS Orku á Reykjanesi og verður hún stærsta stöð sinnar tegundar í heiminum þegar hún verður fullgerð.

PWC krefur Glitni um 82 milljónir

Endurskoðunarfyrirtækið PricewaterhouseCoopers hefur gert kröfu um að slitastjórn Glitnis greiði því rúmar 82 milljónir króna í skaðabætur vegna málareksturs fyrir dómstóli í New York sem engu skilaði. Ríkisútvarpið greindi frá þessu í gær. Þar sagði jafnframt að allir sjömenningarnir sem slitastjórnin stefndi fyrir rétt í New York undirbyggju nú sams skonar kröfur vegna málskostnaðar.

Íslensku metanóli blandað saman við bensín

Vonast er til að framleiða um fimm milljónir lítra af metanóli á ári í fyrstu íslensku metanólverksmiðjunni sem opnuð var formlega í dag. Metanóli úr verksmiðjunni er blandað saman við bensín til að gera það vistvænna.

Stærsta viðskiptatækifæri sem Íslendingar hafa staðið frammi fyrir

"Lagning sæstrengs til Evrópu, samhliða öflugri iðnaðaruppbyggingu á Íslandi, er líklega eitt stærsta viðskiptatækifæri sem Íslendingar hafa staðið frammi fyrir," sagði Hörður Arnarson, forstjóri Landsvirkjunar á ársfundi fyrirtækisins í dag.

Framkvæmdastjórn AGS lokið umræðum um íslensk efnahagsmál

Hinn 6. apríl fór fram reglubundin umræða um stöðu og horfur í íslensku efnahagslífi (e. 2012 Article IV Consultation) í framkvæmdastjórn Alþjóðagjaldeyrissjóðsins. Þetta kemur fram í tilkynningu frá Seðlabanka Íslands.

Reisa vindmyllur í tilraunaskyni í sumar

Landsvirkjun ætlar að reisa tvær vindmyllur í sumar við Búrfell í tilraunaskyni. Hörður Arnarson, forstjóri Landsvirkjunar, upplýsti þetta á ársfundi fyrirtækisins í dag. Hörður sagði vindorkuna vera spennandi kost vegna mikils landrýmis á Íslandi og vegna þess að umhverfisáhrifin væru afturkræf.

Bryndís: Vitlaust að stjórnir ákvarði ekki laun stjórnenda

Bryndís Hlöðversdóttir, stjórnarformaður Landsvirkjunar, sagði í ræðu sinni á ársfundi Landsvirkjunar, sem nú stendur yfir í Silfurbergssalnum í Hörpu, það óheppilegt að fella kjör stjórnenda samkeppnisfyrirtækja undir kjararáð eða aðra en stjórn félaganna. Sagði hún það ekki skipta máli hvort um opinber fyrirtæki væri að ræða, því starfskjarastefna fyrirtækja á samkeppnismarkaði skipti miklu máli við heildarstefnumótun. Þess vegna ættu stjórnir fyrirtækja alltaf að hafa starfskjarastefnu á sínu borði.

Oddný: Nauðsynlegt að rannsaka virkjunarkosti í biðflokki betur

Oddný G. Harðardóttir, fjármálaráðherra, segir að Ísland standi frammi fyrir miklum tækifærum í framtíðinni vegna umhverfisvænnar orku sem hér er nýtt til raforkuframleiðslu. Til framtíðar litið geti skynsamleg nýting orkunnar skipt sköpum við að efla lífskjör í landinu.

Kærir málsmeðferð sérstaks saksóknara til umboðsmanns Alþingis

"Mér finnst þetta frekar "sloppí" rannsókn og hæpið að þeir séu hæfir til þess að rannsaka mál þar sem þeirra eigin starfsmaður kemur að málinu," segir Ólafur Hauksson, einn af stofnendum Iceland Express, en hann skrifar grein í Fréttablaðið og á Vísi í dag þar sem hann lýsir átökum sínum við endurskoðendafyrirtækið Deloitte og svo síðar sérstakan saksóknara.

Rekstrarafkoma Kópavogs neikvæð um 751 milljón

Niðurgreiðsla skulda Kópavogsbæjar umfram lántökur var rúmlega 1.650 milljónir króna á síðasta ári. Þetta er meðal þess sem kemur fram í ársreikningi Kópavogsbæjar fyrir árið 2011. Hann var lagður fram á bæjarráðsfundi í morgun og samþykktur til afgreiðslu í bæjarstjórn. Fyrri umræða er væntanleg 24. apríl.

Hamborgarabúllan í útrás

Hamborgarabúllan mun á næstunni opna búllu í Lundúnum. Yfirbragð staðarins verður svipað því sem er hér á Íslandi og matseðillinn verður sá sami, eftir því sem fram kemur í Viðskiptablaðinu í dag.

Umsvif hjá Fjarðalaxi í Patreksfirði

Laxeldisfyrirtækið Fjarðalax á Vestfjörðum er nú að undirbúa umfangsmikið laxeldi í Patreksfirði og ætlar að sleppa hátt í milljón seiða í stóra sjókví þar í sumar. Þetta er þriðja kynslóð í eldi fyrirtækisins, en nú er verið að slátra úr frystu kynslóð, sem alin hefur verið í Tálknafirði og farið verður að slátra úr annarri kynslóð úr Arnarfirði í haust.

Sæstrengur: Orkumálaráðherra Breta væntanlegur til viðræðna

Orkumálaráðherra Bretlands er á leið til Íslands í Maí til viðræðna um lagningu sæstrengs til Bretlands. Fjallað er um málið í breskum miðlum í dag og þar er haft eftir Charles Hendry orkumálaráðherra bresku ríkisstjórnarinnar að hafnar séu viðræður um að leggja sæstreng til Bretlands. Hendry segir að íslensk stjórnvöld séu mjög áhugasöm um málið.

Ætlar að fjárfesta í frumkvöðlastarfsemi

Stóru bankarnir þrír bjóða allir upp á vettvang til að styðja við frumkvöðlastarfsemi. Landsbankinn og Íslandsbanki hafa boðið upp á aðstöðu, styrki og ráðgjöf. Arion ætlar nú að bjóða upp á að gerast meðfjárfestir í verkefnum.

Búin að vera rússíbanareið

Húsasmiðjan hefur gengið í gegnum mikinn ólgusjó á síðustu árum. Fyrirtækið hefur farið frá því að vera rótgróið fjölskyldufyrirtæki, stofnað árið 1956, í að vera orðið formlegur hluti af dönsku byggingavörukeðjunni Bygma. Í millitíðinni gekk það í gegnum tvær skuldsettar yfirtökur sem skiluðu því undir yfirráð banka.

Neitar að upplýsa um virði FIH-seljendaláns

Seðlabanki Íslands vill ekki gefa upp hvert bókfært virði seljendaláns sem veitt var við sölu FIH-bankans haustið 2010 er. Lánið er ein helsta eign bankans og er geymt í dótturfélagi hans, Eignasafni Seðlabanka Íslands (ESÍ). Í svari Seðlabankans við fyrirspurn Markaðarins segir að "ekki eru veittar upplýsingar um virði einstakra bréfa“. Seðlabankinn eignaðist veð í FIH þegar hann lánaði Kaupþingi 500 milljónir evra skömmu áður en bankinn féll í október 2008.