PWC krefur Glitni um 82 milljónir

Endurskoðunarfyrirtækið PricewaterhouseCoopers hefur gert kröfu um að slitastjórn Glitnis greiði því rúmar 82 milljónir króna í skaðabætur vegna málareksturs fyrir dómstóli í New York sem engu skilaði. Ríkisútvarpið greindi frá þessu í gær. Þar sagði jafnframt að allir sjömenningarnir sem slitastjórnin stefndi fyrir rétt í New York undirbyggju nú sams skonar kröfur vegna málskostnaðar.

Slitastjórnin stefndi sjömenningunum í því sem kallað var klíka Jóns Ásgeirs Jóhannessonar og endurskoðunarfyrirtækinu vegna skuldabréfaútboðs Glitnis vestanhafs 2007. Slitastjórnin krafðist jafnvirði rúmlega 250 milljarða íslenskra króna í skaðabætur. Málinu var hins vegar endanlega vísað frá dómi í fyrra með þeim rökum að það ætti heima fyrir íslenskum dómstólum, ekki bandarískum.

Haft var eftir Stefáni Geir Þórissyni, lögmanni PricewaterhouseCoopers, á RÚV í gær að málatilbúnaður slitastjórnarinnar hefði reynst tilhæfulaus og að þetta hefði verið dýrasta réttarfarstilraun í Íslandssögunni.

Steinunn Guðbjartsdóttir, formaður slitastjórnar, sagði við RÚV að stefnan hefði ekki verið tilhæfulaus heldur gerð að ráði þarlendra lögmanna. Hafni slitastjórnin kröfunni fari hún fyrir dómstóla. - sh